बाँकेको खजुरास्थित सुशील कोइराला प्रखर क्यान्सर अस्पतालमा ब्राकीथेरापी मेसिन जडानसँगै पाठेघरको मुखको क्यान्सरको अप्रेसन सुरु गरिएको छ । तीन करोड बढीको ब्राकीथेरापी मेसिन जडान गरिएपछि खजुरामा क्यान्सर बिरामी आउने क्रम सुरु भएको छ ।

देशभरमै वीर अस्पताल र भरतपुर क्यान्सर अस्पतालपछि खजुरामा मात्रै ब्राकीथेरापी मेसिन रहेको छ । निजी क्षेत्रमा काठमाडौंको नेपाल क्यान्सर अस्पतालले यो सेवा दिइरहेको छ । बर्दिया राजापुरका कमलबहादुर चौधरीले श्रीमतीको पाठेघरको पहिलो र दोस्रो अप्रेसन भरतपुर क्यान्सर अस्पतालमा गराएका थिए ।

तेस्रो अप्रेसन खजुरा क्यान्सर अस्पतालमा गराएका छन् । ‘यही सेवा लिन चितवन र काठमाडौँ जानुपथ्र्यो । खजुरामै सेवा पाएपछि समय, पैसा बचेको छ,’ चौधरीले भने, ‘हप्ता दिनमा तीन पटक अप्रेसन गर्नुपर्छ । टाढा जाँदा बसाइ र खानपिनमै धेरै पैसा खर्च हुन्थ्यो ।’ तीन पटक अप्रेसन गर्दा खजुरामा ४५ हजार रुपैयाँ खर्च लाग्छ ।

निजी अस्पतालमा यही सेवा लिँदा एक लाख खर्च हुने चिकित्सकहरु बताउँछन् । १५ महिना भरतपुर क्यान्सर अस्पतालमा काम गरेका खजुराका मेडिकल फिजिसिष्ट डा.तीर्थराज अधिकारीले खजुरामा ब्राकीथेरापी मेसिन जडान भएपछि चितवन र काठमाडौँबाट समेत बिरामी आउन थालेको बताए ।

अस्पतालमा अन्तर्राष्ट्रिय मेडिकल फिजिक्स सर्टिफिकेसन बोर्डबाट रेडियसन अन्कोलोजी फिजिसिष्टको मान्यता पाएका डा.अधिकारी र रेडियसन अन्कोलिष्ट डा.मुकेश यादवले ब्राकीथेरापी सेवा दिइरहेका छन् । डा.अधिकारीले पश्चिम क्षेत्रका बिरामीले आफ्नै ठाउँमा सुलभ र गुणस्तरीय उपचार सेवा पाएको बताए ।

अस्पतालका निर्देशक डा.कृष्ण आचार्यले खजुरामा नयाँ प्रविधिको प्रयोग बढिरहेको बताए । ‘डिपार्टमेन्टहरु थपिएका छन् । बिरामीको चाप बढ्दो छ,’ निर्देशक डा.आचार्यले भने, ‘अहिले यहाँका बिरामीमा ५० प्रतिशत क्यान्सर र ५० प्रतिशत अन्य रोगका छन् ।’ अस्पताल व्यवस्थापन समितिले हालै खजुरा क्षेत्रका बिरामीलाई ओपीडी निःशुल्क गरेको छ ।

समितिका अध्यक्ष किशोर थापा नियुक्ति हुनेबित्तिकै खजुरावासीका लागि ओपीडी निःशुल्क गरेका हुन् । अस्पतालले ओपीडी शुल्क ५० रुपैयाँ लिँदै आएको थियो । खजुरावासीका लागि ओपीडी निःशुल्क गर्दा बिरामीको चाप बढ्ने विश्वास गरिएको छ । महायज्ञबाट संकलित रकमबाट क्यान्सर अस्पतालको निर्माण सुरु गरिएको थियो । पछि यसलाई सरकारीकरण गरेर बाँकेका नेता पूर्वप्रधानमन्त्री सुशील कोइरालाको नाममा दिइएको हो ।