बाँके । स्वास्थ्य तथा जनसङ्ख्या मन्त्रालयले राष्ट्रिय हात्तीपाइले रोग निवारण कार्यक्रम लामो समय सञ्चालन गर्दा पनि सफल हुन नसकेका जिल्लामा पुनः सर्वेक्षण गर्ने भएको छ ।

बाँकेको नेपालगन्ज उपमहानगरपालिका–४, सल्यानीबङ्गला र कोहलपुर नगरपालिका ५ र ६ को रझेनामा यही फागुन पहिलो साता सर्वेक्षण गर्ने (री–प्री–टास सर्वे) तयारीका लागि स्वास्थ्य तथा जनसङ्ख्या मन्त्रालय किटजन्य रोग अनुसन्धान तथा तालिम केन्द्र हेटौँडाको टोली बाँके आइपुगेको छ ।

‘हात्तीपाइलेको अवस्था सर्वेक्षणभन्दा पहिले स्थानीय तह र वडा तहसम्म जनप्रतिनिधि र स्वास्थ्यकर्मीसहितको अन्तरक्रिया गरिनेछ,’ केन्द्रका भेक्टर कन्ट्रोल अधिकृत कुमार पोखरेलले भने, ‘यो सफल भएमा एक पटक अभियान सञ्चालन गरेपछि फेरि गर्नुपर्दैन ।’

पाँच वर्ष माथिकाको शरीरमा हात्तीपाइले रोग भए नभएको पहिचान गर्न तथा आमऔषधि सेवन कार्यक्रमको प्रभावकारिता पहिचानका लागि सर्वेक्षण गर्न लागिएको हो । नेपालगन्जमा ३०० जना र कोहलपुरमा ३०० जना गरी ६०० जनाको रक्त नमुना सङ्कलन गरी जाँच गरिने उनले बताए ।

सर्वेक्षणमा पाँच जनासम्म अर्थात् दुई प्रतिशतभन्दा कममा देखिएमा सफल मानेर अन्तिममा एक पटक मात्रै आमऔषधि कार्यक्रम सञ्चालन गर्नुपर्ने हुन्छ । बाँकेमा हालसम्म ११ पटकसम्म आमऔषधि सेवन कार्यक्रम सञ्चालन भए पनि यसअघि भएका सर्वेक्षण असफल भएका कारण फेरि यस वर्ष पनि कार्यक्रम सञ्चालन गर्नुपर्ने भएको छ ।

सबैभन्दा बढी देखिएको स्थानमा सर्वेक्षणमा घटेको पाइएमा अन्य स्थानको पनि घट्छ भन्ने मान्यता रहने स्वास्थ्यकर्मीको भनाइ छ । केन्द्रका वरिष्ठ स्वास्थ्य प्रशासक डा.युवराज पोखरेलसहितको टोलीले बाँकेमा स्थानीय तहमा अन्तरक्रिया गरिरहेको छ । नेपालगन्जमा अहिलेसम्म औषधि सेवन गर्न आनाकानी गर्ने गरेको स्वास्थ्यकर्मीको भनाइ छ ।