बाँके । बाँकेको खजुरामा फिल्मी शैलीमा अपहरण गरेर बलात्कार गर्नेमध्ये दुई जनालाई बाँके प्रहरीले पक्राउ गरेको छ ।

आफ्ना सहयोगी केटा साथीसँग खजुराको सी गाउँस्थित पुलमा फोटो खिचाइरहेको अवस्थामा केटा साथीलाई कुटपिट गरेर भगाएर अपहरण गरी पटक पटक बलात्कार गर्ने पाँच जनामध्ये दुई जनालाई प्रहरीले पक्राउ गरेको हो ।

नेपालगन्जमा बस्दै आएकी जाजरकोटकी १६ वर्षीया युवतीलाई अपहरण गरी बलात्कार गरेको अभियोगमा प्रहरीले दुई जनालाई पक्राउ गरेको जनाएको छ । पक्राउ पर्नेमा खजुरा गाउँपालिका–१ सैनिकका हरिश सुनार र स्थानीय नेप्टे छन् ।

सुनारले उनकै भे १० प ८६३ नं. मोटरसाइकलमा बसालेर अन्य चार जना साथीको सहयोगमा अपहरण गरी जंगलमा र उनकै घरमा दुई पटक बलात्कार गरेको प्रहरी समक्ष बयान दिएको बाँके प्रहरी प्रवक्ता डीएसपी मधुसुधन न्यौपानेले जानकारी दिए ।

अर्का सहयोगी नेप्टेलाई धनौली प्रहरीले पक्राउ गरेको छ भने सुनारका सहयोगी अपहरणकर्ताहरु खजुरा १ सैनीककै स्थानीय सुमित गाहा मगर, सुसान्त गाहा मगर र नबिन थापा फरार रहेको प्रहरी प्रवक्ता न्यौपानेले बताए ।

प्रहरीले सुनारलाई जबर्जस्ती करणी गरिरहेकै अवस्थामा घरबाट पक्राउ गरेको छ । नेपालगन्ज बस्दै आएकी ती युवती आफ्ना साथीहरु नेपालगन्जकै बेलासपुरका आबिद खान, सुरज बर्मा र कृष्णसिंह ठाकुरको साथमा फोटो खिच्न खजुरास्थित सी गाउँको पुलचोकमा पुगेका थिए ।

सँगै गएका तीन जना केटा साथीलाई पाँच जनाको समूहमा आएका युवाले कुटेर लखेटेपछि उनको अपहरण गरिएको थियो । अपहरणपछि मोटरसाइकलमा राखेर पहिले जंगलमा पुर्याएर बलात्कार गरेको र त्यसपछि पुनः घरमा ल्याएर बलात्कार गर्दा गर्दै प्रहरीले फेला पारेको थियो । प्रहरीले कुटपिट तथा अपहरण र बलात्कारमा संलग्न अन्य युवाको खोजी गरिरहेको जनाएको छ ।