एजेन्सी । अमेरिकाको न्युयोर्कमा संकटकाल घोषणा गरिएको छ । न्युयोर्कका गभर्नर काथी होचुलले राज्यभर संकटकाल लागू गरिएको घोषणा गर्नु भएको अधिकारीहरुले जनाएका छन् ।

कोरोनाभाइरसको महामारी बढ्दै गएको र कोरोनाभाइरसको नयाँ भेरियन्ट अझ खतरनाक रहेको लगायतका कारणले संकटकाल लगाउनु परेको उहाँले स्पष्ट पार्नु भएको छ ।

“पछिल्लो समयमा कोरोनाभाइरसबाट सङ्क्रमित भएर अस्पताल भर्ना हुनेहरुको सङ्ख्या बढेकाले थप महामारी फैलिन नदिनका लागि संकटकाल लगाइएको हो,” गभर्नरले भन्नुभएको छ ।

कोरोनाभाइरस पछिल्लो समयमा एकबाट अर्कोमा सर्ने क्रम पनि तीव्र देखिएकाले थप चिन्तित बनाएकाले सतर्कता अपनाउनु परेको उहाँको भनाइ छ ।

अहिले घोषणा गरिएको संकटकाल आगामी सन् २०२२ को जनवरी १५ सम्म लागू हुने र आवश्यकता अनुसार लम्बिन पनि सक्ने उहाँले स्पष्ट पार्नु भएको छ ।

शुक्रबार बेलुका निर्देशन जारी गर्दै उहाँले संकटकाल लागू गरेसँगै अस्पतालको क्षमता बृद्धिमा पनि सरकारले काम गर्ने जानकारी दिनुभयो । त्यसैगरी खोपको प्रयोगलाई पनि विस्तार तथा वृद्धि गर्ने उहाँको भनाइ छ ।

दक्षिण अफ्रिकामा नयाँ कोरोनाभाइरसको रुपमा ओमिक्रोन कोरोनाभाइरस फैलिएको भन्ने सूचनाका आधारमा पूर्वसतर्कता स्वरुप पनि न्युयोर्कमा संकटकालको घोषणा गरिएको अधिकारीहरुले जनाएका छन् ।

न्युयोर्कसहित अमेरिकाले अन्य राज्यहरुलाई पनि उच्च सतर्कता अपनाउन तथा प्रतिबन्धात्मक व्यवस्थाहरु लागू गर्न आह्वान गरेको छ ।

त्यसैगरी बेलायत, क्यानडा लगायत कैयौं युरोपेली मुलुकहरुलाई समेत विदेशबाट आउने यात्रुहरुको प्रवेशमा कडाइ गर्न सुझाइएको छ ।

बेलायतद्धारा ६ मुलुकसँगको उडान सेवा बन्द

बेलायतले कोरोनाभाइरसको नयाँ संस्करण पत्ता लागेको समाचार सार्वजनिक भएसँगै विभिन्न छ मुलुकसँगको हवाइ सेवा बन्द गरेको छ ।

यही शुक्रवार मध्याह्न १२ बजेदेखि ती देशहरूलाई खतरापूर्ण मुलुकको सूचीमा राखेर ती आवत जावत बन्द गर्ने निर्णय गरिएको बेलायतका स्वास्थ्यमन्त्री शाजिद जावेदले जानकारी दिनुभयो ।

ओमिक्रोन नाम दिइएको नयाँ संस्करणको कोरोना भाइरस भेटिएको पुष्टि भएका र भेटिन सक्ने खतरा रहेका देशहरुबाट हुने उडान बेलायतमा प्रतिबन्ध लगाइएको हो ।

नयाँ भाइरस आफ्नो देशमा नभित्रियोस भन्ने उद्धेश्यले बेलायतले दक्षिण अफ्रिका, नामिबिया, जिम्बाब्वे, बोत्स्वाना, लेसेथो र इस्वाटीटीसँगका सबै उडानहरु स्थगित गरेको हो।

अधिकारीहरुका अनुसार अहिलेसम्म सो नयाँ भाइरस दक्षिण अफ्रिका, हङकङ र बोत्स्वाना गरी तीन देशमा कुल ५९ जनामा मात्रै पुष्टि भएको छ ।

अहिलेसम्म पुष्टि भएका मध्ये सबैभन्दा खतरापूर्ण भइरस भएकाले र अहिले खोपले पनि काम गर्न नसक्ने भएकाले बेलैमा उच्च सतर्कता अपनाउनु परेको अधिकारीहरुको भनाइ छ।

त्यसैगरी पछिल्लो १० दिनभित्र ती देशमा गएर फर्किएका यात्रुलाई पनि बेलायत प्रवेशमा रोक लगाइएको छ ।

तर बेलायती नागरिकलाई भने उच्च सतर्कताका साथ परीक्षण गराएर क्वारेन्टिनमा राखेर मात्रै गन्तव्यमा जान पाउने व्यवस्था गरिएको छ

जर्मनीमा उच्च सतर्कता

दक्षिण अफ्रिकाबाट फर्किएका एक व्यक्तिमा नयाँ कोभिड–१९ भेरिएन्टको शंकास्पद घटना पत्ता लागेको एक जर्मनी क्षेत्रीय अधिकारीले शनिबार बताएका छन् ।

दक्षिणी अफ्रिकामा पहिलो पटक पत्ता लागेको तनावलाई संकेत गर्दै पश्चिमी राज्य हेस्सीका सामाजिक मामिलामन्त्री काइ क्रोजले ट्वीटमा लेख्नुभएको छ, “नयाँ सङ्क्रमितमा ओमिक्रोन भेरिएन्टको बलियो सम्भावना रहेको छ ।” दक्षिण अफ्रिकाबाट जर्मनी फर्केका यात्रुको शुक्रबारको अन्ततिर गरिएको परीक्षणले ‘ओमिक्रोन‘का थुप्रै ‘म्युटेसन’हरू सङ्केत गरेको कुरा क्रोजले बताउनुभयो ।

“नयाँ भेरिएन्टको प्रबल शङ्कापछि कोभिड–१९ सङ्क्रमित उक्त व्यक्तिलाई उनकै घरम एक्लै बस्न लगाइएको छ । यसबारे थप अनुसन्धान हुन बाँकी नै छ ।” सङ्क्रमित उक्त व्यक्ति जर्मनीको सबैभन्दा व्यस्त फ्र्याङ्कफर्ट अन्तर्राष्ट्रिय विमानस्थल हुँदै ईयुको सबैभन्दा बढी जनसंख्या भएको देश (जर्मनी)मा आइपुगेको मन्त्रालयले जानकारी गराएको छ ।

बेल्जियमले कोभिडको खोप नलगाएका एक व्यक्ति कानून विपरित शुक्रबार विदेशबाट फर्किएका र उनमा नयाँ कोभिड–१९ भेरिएन्ट भेटिएको बताएको एकदिनपछि जर्मनीमा कोभिडको नयाँ भेरिएन्ट सङ्क्रमित फेला परेको बताइएको हो । बेल्जियमले युरोपमा यो नयाँ भेरिएन्ट सङ्क्रमितको पहिलो घटना भेटिएको बताएको छ ।

बेल्जियमका एक चर्चित ‘भाइरलोजिस्ट’ मार्क भान रान्स्टले ट्वीट गर्दै उक्त व्यक्ति नोभेम्बर ११ मा इजिप्टबाट फर्किएको बताउनुभएको थियो । विश्व स्वास्थ्य संगठनले शुक्रबार हालै पत्ता लागेको ओमाइक्रोन नाम दिइएको बी.१.१.५२९ प्रकारको कोभिड–१९ लाई चिन्ताको विषय घोषणा गरेको छ ।

यूरोपेली संघका स्वास्थ्य अधिकारीहरूले यस नयाँ तनावले महाद्वीपको लागि ‘अझ धेरै जोखिम’ उत्पन्न गरेको बताएका छन् ।

यूरोपेली संघका अधिकारीहरू यस ब्लकका सबै २७ राष्ट्रहरूलाई विभिन्न दक्षिण अफ्रिकी राष्ट्रहरूको यात्रामा प्रतिबन्ध लगाउन आग्रह गर्न शुक्रबारको दिन सहमत भए जुन नीति जर्मनीले लागू गरिसकेको छ ।