बर्दिया । बर्दियाकाे गुलरिया नगरपालिका ५ सन्तोषी टोलमा रहेकाे बृस पशुपक्षी तथा बाख्रापालन फर्मका २३ खसी–बाख्रा चितुवाले मारेको छ ।

खोरभित्र बाँधिएका २३ खसी–बाख्रालाई चितुवाले मार्दा झन्डै तीन लाख रुपैयाँ बराबरको क्षति भएको पीडित चन्द्रकान्त पौडेलले जानकारी दिनुभयो । नजिकैको सामुदायिक वनबाट आएको चितुवाले गए राति सबै खसी–बाख्रा मारेको पौडेलले बताउनुभयो ।

सूचना प्राप्त भएलगत्तै घटनास्थलमा प्रहरी जाँदा सम्पूर्ण खसी तथा बाख्रा मृत अवस्थामा फेला परेका र अन्य विस्तृत विवरण आउन बाँकी रहेको जिल्ला प्रहरी कार्यालयका प्रहरी निरीक्षक (इन्स्पेक्टर) गोपाल पौडेलले जानकारी दिनुभयो ।