काठमाडौं । प्रधानमन्त्री शेरबहादुर देउवाले परराष्ट्रमन्त्रीमा नेपाली कांग्रेसका नेता डाक्टर नारायण खड्कालाई नियुक्त गरेका छन् । खड्का परराष्ट्रमन्त्रीमा नियुक्त भएको जानकारीसहितको पत्र राष्ट्रपतिसमक्ष पठाइसकिएको देउवाको सचिवालयले जनाएको छ ।

‘परराष्ट्रमन्त्रीमा नारायण खड्कालाई नियुक्त गरिएको जानकारी राष्ट्रपतिलाई गराइ सकिएको छ,’ प्रधानमन्त्री देउवाका स्वकीय सचिव भानु देउवाले भने, ‘दिउँसो १ बजे शपथ गरेसँगै आजै कार्यभार सम्हालेर मन्त्री खड्का संयुक्त राष्ट्रसंघको महासभामा भाग लिन न्युयोर्क जाने कार्यक्रम छ ।’

सत्ता गठबन्धनका नेताहरूको मंगलबार बसेको बैठकमा डाक्टर खड्कालाई परराष्ट्रमन्त्री नियुक्त गर्ने सहमति भएको थियो । थप मन्त्रीको टुंगो लगाउन कांग्रेसले ३ बजे पदाधिकारी बैठक बोलाएको छ । यस्तै, माओवादी केन्द्रले मन्त्रीको टुंगो लगाउन ३ बजे नै स्थायी कमिटी बैठक बोलाएको छ ।