काठमाडौं । भेरी अस्पतालको कोभिड वार्डमा खटिएका स्वास्थ्यकर्मीमाथि आक्रमण गर्ने व्यक्तिविरुद्ध किटानी जाहेरी दर्ता गरिएको छ ।

दाङ, तुलसीपुरका कोभिड संक्रमित (५२) डिल्ली रावतको उपचारका क्रममा बिहीबार राति मृत्यु भएपछि आक्रोशित भएका आफन्तले स्टाफ नर्स, चिकित्सकलगायतलाई आक्रमण गरेका थिए । पीडित स्वास्थ्यकर्मीहरूले शुक्रबार जिल्ला प्रहरी कार्यालय बाँकेमा जाहेरी दर्ता गराएका हुन् ।

जिल्ला प्रहरी कार्यालय बाँकेका प्रमुख एवम् प्रहरी उपरीक्षक ओम रानाले आक्रमणमा संलग्न मानबहादुर रावत, लोकराज र भरत रावतविरुद्ध भेरी अस्पतालका ७ जना स्वास्थ्यकर्मीले किटानी जाहेरी दर्ता गराएको जानकारी दिए । उनकाअनुसार, जाहेरी दिएका ३ जनालाई नै यसअघि प्रहरीले भेरी अस्पतालबाट पक्राउ गरेको छ ।

राजनीतिक ‘पावर’मा आफूहरूको हत्या गर्ने उद्देश्यले नै आक्रमण गरेको भन्दै नेपालगन्जका चिकित्सक, नर्सलगायतले भेरी अस्पताल परिसरमा बिहान नाराबाजी गरेका थिए ।

उनीहरुको आन्दोलनका कारण कोभिड वार्डमा भर्ना भएका संक्रमित बिरामीको उपचार प्रभावित बन्न पुगेको छ । आक्रमणमा संलग्न ब्यक्तिलाई ज्यान मार्ने उद्योग अन्तर्गत मुद्दा चलाउन स्वास्थ्यकर्मीले माग गरेका छन् ।

रावतको मृत्यु भएपछि राति करिव ८ बजेतिर मृतकका भाई मानबहादुरसहितको एक समूहले चिकित्सक, स्टाफ नर्सलगायतलाई आक्रमण गरेको थियो । आफन्तको मृत्युलगत्तै चारैतिरबाट जम्मा भएर लखेट्दै घाँटी थिचिदिएका थिए ।

आक्रमणबाट डा. चन्द्रप्रकाश साहु, डा. दीपक गुप्ता, डा. समा अन्सारी, स्टाफ नर्स अस्मिनी गुरुङ, सदिक्षा गैरे र बन्दना श्रेष्ठलाई चोट लागेको अस्पताल प्रशासनले जनाएको छ ।

आक्रमणमा संलग्न मानबहादुर नेकपा एमाले लुम्बिनी प्रदेश कमिटी सदस्य हुन् । संक्रमित रावत यही जेठ ४ गतेदेखि भेरी अस्पतालमा भर्ना भएका थिए ।

दाईको उपचारका क्रममा यसअघि पनि मानबहादुरले आफूहरुलाई लुम्बिनी प्रदेशका मुख्यमन्त्री ‘शंकर पोखरेलको मान्छे हुँ’ भन्दै धम्की दिने गरेको स्टाफ नर्सहरू बताउँछन् ।

नेपाल नर्सिङ संघ बाँकेका अध्यक्ष लक्ष्मी केसीले आक्रमण गर्नेविरुद्ध किटानी जाहेरी दर्ता गरिएको बताइन् ।