धादिङ ।  धादिङको त्रिपुरासुन्दरी गाउँपालिकामा डोजरको ठक्करबाट घाइते भएकी एक महिलालाई जिउँदै पुर्ने चालकलाई पक्राउ गरी सार्वजनिक गरिएको छ ।

सडक निर्माणका क्रममा डोजरको ठक्करपछि घाइते भएकी स्थानीय ४५ वर्षीया सरस्वती कुमाललाई जिउँदै पुर्ने चालक भीमबहादुर बुढाथोकीलाई नेपाल प्रहरीको केन्द्रीय अनुसन्धान ब्युरो (सीआईबी) ले पक्राउ गरी शुक्रवार सार्वजनिक गरेको हो । सीआईबीका अनुसार चालक बुढाथोकीलाई कञ्चनपुरबाट पक्राउ गरिएको हो ।

धादिङको त्रिपुरासुन्दरी–१ सल्यानटारको खोल्सी जिपजिपेमा सडक निर्माणका क्रममा डाेजर (एक्स्काभेटर) ले घाँस बोकेर घरतर्फ फर्किँदै गरेकी कुमाललाई ठक्कर दिएको थियो ।

ठक्करपछि कुमाल खाल्डोमा खस्नुभएको थियो । चालक भीमबहादुरले उद्धार गर्नुको साटो कुमाल खसेको खाल्डोमा वरिपरिको माटो खनेर पुरिदिएका थिए ।

काठमाण्डौबाट सल्यानटार हुँदै आरघाटमका लागि छुटेको बसका यात्रुले ‘एक्स्काभेटरले मान्छे पुर्‍याे’ भन्दै हल्ला गरेपछि चालक बुढाथोकी भागेका थिए । खाना खाँदै गरेका सडकमा मजदुरले कुमालको शव निकालेका थिए ।