बाँके । नेपालगन्ज मेडिकल कलेज शिक्षण अस्पताल कोहलपुरमा सुरक्षा खटिएका प्रहरी नै विचौलिया भएको खुलेको छ । प्रहरी हवल्दार भुवन शाहले विगत ७ बर्षदेखि मेडिकल कलेजमा बिचौलियाको काम गर्दै आइरहेको यतिबेला खुलेको हो । मेडिकल कलेज कोहलपुरमा उपचारका लागि आउने घाइते तथा बिरामीलाई औषधी खरिदका लागि उनले हात समातेर आफ्नो मेडिकलमा पठाउने र महँगोमा औषधी भिडाउने गरेको खुलेको छ ।

हवल्दार शाहले साईकुमारी फार्मेसीमा लगानी गरेको पनि स्थानीय बताउँछन् । यसअघि शाहले सवारी दुर्घटनाको घटनामा आवश्यक पर्ने औषधी मेडिकल कलेजको उत्तर गेट नजिकै रहेको भुषाल मेडिकलबाट पठाउने गरेका थिए । उक्त मेडिकलबाट भन्दा अन्य मेडिकलले कमिशन बढी दिने भएपछि उनले सोही स्थान नजिकै रहेका आस्था, नागरिक र साथी फार्मेसीबाट औषधी पठाई मोटो रकम कमिशन लिने गरेकोसमेत मेडिकल सञ्चालकहरु बताउँछन् ।

०७५ सालदेखि मेडिकल कलेजको उत्तर गेट नजिकै आफ्नै लगानीमा साईकुमारी फार्मेसी खोलेर विरामीलाई उतै ओसार्न थालेको स्थानीय बताउँछन् । शिवलाल जैसीको नाममा दर्ता भई सञ्चालनमा रहेको उक्त मेडिकलमा बिरामी तथा घाइतेबाट चर्को रकम असुल्दै आएको छ । प्रहरी नै औषधी ब्यापारी बनेपछि उनका विरुद्ध बोल्ने कसको हिम्मत ? केही भन्यो भने कुनै घटनामा फसाई दिने हो की भन्ने त्रासमा स्थानीय रहेको बुझिएको छ ।

केही महिनाअघि ईलाका प्रहरी कार्यालय कोहलपुरमा कार्यरत एक प्रहरी जवान मोटरसाइकल दुर्घटनामा परेका थिए । तर, गतिलो कमिशन नआउने भनेपछि हवल्दार शाहले उनको उपचारमा समेत लापरवाही गरेका थिए । पछि ती जवानको ज्यानसमेत गएको थियो । उनी विगत लामो समयदेखि शिक्षण अस्पतालमा कार्यरत छन् । मेडिकल डाइरेक्टरसँग गतिलै हिमचिम बनाएका हवल्दार शाहले यहाँका कर्मचारीलाई समेत दुर्व्यवहार गर्ने गरेको खुलेको छ ।

मेडिकल कलेजबाट अन्यत्र रिफर हुने विरामीबाट समेत आफनो र आफू नजिकको अस्पताल र मेडिकलमा पठाएर हवल्दार शाहले गतिलै कमिशन लिने गरेको एक एम्बुलेन्स चालक बताउँछन् । उपचारका लागि आएका घाइते तथा बिरामीलाई थप उपचारका लागि रिफर गर्नुपरेमा प्रहरी हवल्दारले भारतको लखनउस्थित सामरा हस्पिटलमा रिफर गर्न लगाउने गरेका छन् ।

एम्बुलेन्स चालकले भने ‘उक्त हस्पिटलबाट समेत मोटो रकम कमिशन लिने गरेको र घाइते तथा बिरामी तथा मृतकको शव सम्बन्धित स्थानमा लैजाँदा बाटोको दुरी हेरी ५ सयदेखि २ हजारसम्म हवल्दारलाई कमिशन दिँदै आएका छौ ।’ स्रोतका अनुसार हवल्दार शाहले मेडिकल कलेजमा बस्नका लागि इलाका प्रहरी कोहलपुरका प्रमुख डिएसपीदेखि बाँकेका प्रहरी प्रमुख एसपीसम्ममा गतिलै सेटिङ्ग मिलाएको पनि सार्वजनिक भएको छ ।

हवल्दार शाहलाई घुमुवा प्रहरी जितेन्द्रजङ केसीले सहयोग गर्दै आएका छन् । उनी घुमुवाको निहुँमा यस क्षेत्रका व्यवसायीबाट मोटो रकम असुली गर्नेमध्येका नाइके भएको खुलेको छ । ईलाका प्रहरी कार्यालय कोहलपुरका प्रहरी नायव उपरीक्षकका विश्वास पात्र मानिन्छन् । क्रसर व्यापारी, भन्सार छली गर्ने गिरोह लगायतका ब्यापारीबाट पैसा उठाउने गरेको भनि उजुरी परेपछि छानबिनमा परेका केसीलाई हवल्दार शाहकै पहुँचमा कारवाही हुन नसकेको पनि थाहा भएको छ ।