दाङ । प्रतिनिधिसभा विघटन गरी पार्टी ई समूहमा बाँडिएपछि प्रधानमन्त्री तथा नेकपा  अध्यक्ष केपी शर्मा ओली दिनहुँ जसो पार्टीका भेला तथा सभाहरूमा व्यस्त हुने गरेका छन् । यसै सिलसिलामा सोमबार ओली दाङ आउने कार्यक्रम छ ।

उनी करिब पौने १२ बजे दाङ आइपुग्ने कार्यक्रम छ । दाङका प्रमुख जिल्ला अधिकारी जयनारायण आचार्यका अनुसार प्रधानमन्त्री ओलीको हेलिकप्टर काठमाडौँबाट दाङका लागि उडिसकेको छ । उनी हेलिकप्टरबाट राप्ति पुलमा ओर्लने

साढे १२ः३० बजे पुलको उद्घाटन गर्ने कार्यक्रम रहेको छ । राप्ती गाउँपालिका–७ सिसनिया र गढवा गाउँपालिका–२ महदेवा जोड्ने राप्ती नदीको पुलको ओलीले उद्घाटन गर्ने भएका हुन् । पुल गत असारमै निर्माण सम्पन्न भएर प्रयोगमा आइसकेको थियो ।

पुल उद्घाटनपछि ओली राप्ति गाउँपालिका–२ लालबटियामा आयोजना हुने सभामा सहभागी हुन जाने छन् । नेकपा दाङको ओली समूहले आयोजना गरेको कार्यक्रममा दाङका विभिन्न स्थानबाट करिब ५ हजार व्यक्तिहरु उपस्थित गराउने योजना ओली समूहको छ ।

ओली दाङ आउने भएपछि सुरक्षा व्यवस्था कडा पारिएको छ । सुरक्षाका लागि जिल्ला प्रहरी कार्यालयबाट नेपाल प्रहरी, सीमा सुरक्षा बल भालुवाङबाट सशस्त्र प्रहरी र घोराहीस्थित रिपुमर्दन गणबाट नेपाली सेनाको टोली खटिएको छ ।

सभा सकेर ओली ४ बजे काठमाडौं फर्किने कार्यक्रम रहेको नेकपा ओली समूहका स्थानीय नेताहरुले जानकारी दिएका छन् ।