काठमाडौं । केहि दिन यता लागेको बादल हटेसँगै काठमाडौं उपत्यकामा चिसो बढेको छ ।

हिजाेको तुलानामा आज एकै दिनमा २ डिग्रीले न्यूनतम तापक्रम घटेसँगै काठमाडौंमा थप चिसो बढेको हो । हिजो काठमाडौं उपत्यकाको न्यूनतम तापक्रम ४.५ डिग्री सेल्सियस थियो भने आज घटेर २.५ डिग्रीमा आएको हो ।

बिहान ६ बजे काठमाडौं उपत्यकाको तापक्रम २.५ डिग्री मापन भएको जल तथा मौसम पूर्वानुमान महाशाखाले जनाएको छ । महाशाखाका अनुसार बादल हटेसँगै काठमाडौंसहित अन्य स्थानको पनि न्यूनतम तापक्रम घटेको छ ।

आज अधिकतम तापक्रम १९ डिग्रीसम्म पुग्ने अनुमान गरिएको छ । देशभर पश्चिमी वायुको सामान्य प्रभाव रहेको पनि महाशाखाले जनाएको छ । तराई र पहाडका केही ठाउँमा हुस्सु र कुहिरो भने लागेको महाशाखाले जनाएको छ ।

आज दिउँसो पहाडी केही ठाउँमा आंशिक बदलीको सम्भावना छ । त्यस्तै प्रदेश एकमा राति आंशिक बदली रहने अनुमान गरिएको छ । अरु ठाउँको मौसम भने सफा रहने अनुमान छ ।