काठमाडौं । नवलपुर प्रहरीले कावासोतीमा जुवा खेलिरहेको अवस्थामा करिब दुई लाख रुपैयाँ नगद सहित ८ जनालाई पक्राउ गरेको छ ।

जिल्ला प्रहरी कार्यालय नवलपुरका अनुसार बुधबार बिहान कावासोती १५ गुदार स्थित  मिनराज महतोको घरमा तास खेलिरहेको अवस्थामा ८ जनालाई नियन्त्रणमा लिएको हो ।

पक्राउ पर्नेमा देवचुली ११ का ३६ वर्षीय लिलबहादुर राना, कावासोती १५ का २७ वर्षीय युवराज महतो, २६ वर्षीय रुमेश महतो, ४२ वर्षीय मिनबहादुर थारु, कावासोती १७ का ३३ वर्षीय मधु मगर, कावासोती ८ का ३५ वर्षीय जितेन्द्र शाह र बुलिङटार ४ निवासी ३० वर्षीय छालबहादुर मुक्मी रहेका छन् ।

 उनीहरुको साथबाट प्रहरीले ३ बुक तास, नेपाली रुपैयाँ एक लाख ८६ हजार ९ सय ५ रुपैयाँ, १२ हजारको चेक, १ सय ३० रुपैयाँ भारतीय नोट र विभिन्न देशको पैसा दुई हजार दुई सय ५० रुपैयाँ बरामद गरेको छ ।

जिल्ला प्रहरी कार्यालय नवलपुर र प्रहरी चौकी कोल्हुवाको टोली गएर उनीहरुलाई नियन्त्रणमा लिएको हो । पक्राउ परेकालाई जुवा ऐन अनुसार कारवाही गरिने जिल्ला प्रहरी कार्यालय नवलपुरका प्रहरी उपरीक्षक प्रकाश मल्लले बताए ।