काठमाडौं । अफगानिस्तानको राजधानी काबुलमा रहेको काबुल विश्वविद्यालयमा बन्धुकधारीको आक्रमणबाट कम्तीमा २२ जनाको ज्यान गएको छ । सोमबार बन्दुकधारीले विश्वविद्यालयमा प्रवेश गरेर गोली चलाएका हुन् ।

त्यसपछि सुरक्षाकर्मी र बन्दुकधारीबिच तीन घण्टासम्म भिडण्त भयो । तीन बन्दुकधारी मारिएपछि आक्रमण रोकिएको अफगानिस्तानको आन्तरिक मामिला मन्त्रालयले जनाएको छ ।

इस्लामिक स्टेटको क्षेत्रीय समूहले आक्रमणको जिम्मा लिएको छ । विश्वविद्यालयमा इरानियन पुस्तक मेलाका लागि सरकारी अधिकारी आउने तय भएको समय भन्दा केही पहिलेदेखि आक्रमण सुरु भएको हो ।

केही घण्टासम्म चलेको आक्रमणमा थप २२ जना घाइते भएको स्थानीय अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् । सरकारले मंगलबारका लागि राष्ट्रिय शोकको घोषणा समेत गरेको छ ।