बाँके । नेपाल–भारत सीमानाका जमुनाहाबाट हतियारसहित नेपाल प्रहरीले एक जनालाई पक्राउ गरेको छ । पक्राउ पर्नेमा जाजरकोट भेरी नगरपालिका–९ बस्ने २१ बर्षीय अमृत बिक रहेको प्रहरीले जनाएको छ । प्रहरीले एक थान एयर गन र सोको ३४ राउण्ड गोलीसहित बिकलाई पक्राउ गरेको छ ।
बाँकेको नेपालगन्ज उपमहानगरपालिका–१५ स्थित जमुनाहा नाकाबाट एयर गनसहित बिकलाई पक्राउ गरिएको बाँकेका प्रहरी प्रमूख एवं प्रहरी उपरीक्षक अरुण पौडेलले जानकारी दिनुभयो । चेकजाँचका क्रममा बिकको साथबाट हतियार बरामद भएको प्रहरी उपरीक्षक पौडेलले बताउनुभयो ।
यस्तै जाजरकोट भेरी नगरपालिका ९ कै १६ बर्षीय दिपक बिकको साथबाट पनि प्रहरीले फलामको चेन बरामद गरेको छ । उनीहरु दुवैलाई आवश्यक अनुसन्धानका लागि नियन्त्रणमा लिई जिल्ला प्रहरी कार्यालयको हिरासतमा राखिएको छ ।