प्रहरीले ट्राफिक नियम उल्लङ्घन गरे/नगरेको बारे जानकारी राख्ने तथा जरिवानासमेत बैङ्किङ प्रणालीमा जोड्ने प्रणाली जिल्लामा समेत विस्तार गरेको छ । आजदेखि सात प्रदेशका २१ जिल्लामा उक्त प्रणाली लागू भएको प्रहरी प्रधान कार्यालयले जनाएको छ ।

उक्त प्रणालीलाई ‘ट्राफिक भ्यालुलेसन रेकर्ड सिस्टम सफ्टवयेर’ भनिएको छ । नयाँ आर्थिक वर्ष सुरु भएसँगै आजदेखि उक्त प्रणाली २१ जिल्लामा लागू गरिएको केन्द्रीय प्रवक्ता कुबेर कडायतले जानकारी दिए । यसअघि काठमाडौँ उपत्यकामा उक्त प्रणाली सञ्चालनमा थियो ।

सवारी नियम उल्लङ्घन कसुरहरूको जरिवानाबापत राजस्व सङ्कलनलाई प्रदेशगत रूपमा बैङ्किङ प्रणालीमा जोड्ने योजना अनुरूप उक्त प्रणाली सञ्चालन गरिएको हो । प्रहरी प्रधान कार्यालयका अनुसार सात प्रदेशका तीन/तीन जिल्लामा उक्त प्रणाली सञ्चालन गरिएको छ ।

उक्त प्रणाली कोशी प्रदेशका सुनसरी, मोरङ र झापा, मधेस प्रदेशका सिरहा, पर्सा र महोत्तरी, बागमती प्रदेशका सिन्धुली, काभ्रे र मकवानपुर, गण्डकी प्रदेशका कास्की, तनहुँ र नवलपरासी (पूर्व)मा सञ्चालन गरिएको प्रहरी प्रधान कार्यालयले जनाएको छ ।

यस्तै लुम्बिनी प्रदेशका रूपन्देही, दाङ र बाँके, कर्णाली प्रदेशका सुर्खेत, सल्यान र दैलेख तथा सुदूरपश्चिम प्रदेशका कैलाली, कञ्चनपुर र डोटी जिल्लामा लागू भएको नेपाल प्रहरी प्रधान कार्यालय राजमार्ग सुरक्षा तथा ट्राफिक व्यवस्थापन महाशाखाले जनाएको छ ।