‘वारिस पञ्जाब दे’ संगठनका प्रमुख र खालिस्तान अभियानकर्ता अमृतपाल सिंहको खोजी जारी छ । अमृतपालको खोजीका लागि होशियारपुरमा खोजी अभियान चलिरहेको छ । यहाँ उनको ड्रोनबाट खोजी भइरहेको छ । उत्तराखण्डबाट आएपछि अमृतपाल जालंधरको कपुरथला सीमा नजिकको शिविरमा लुकेका थिए ।

अमृतपालले बुधबार एक भिडियो सार्वजनिक गरेका छन् । उक्त भिडियो नेपालसँग जोडिएको उत्तर प्रदेशको क्षेत्रमा अप्रिल २८ मा खिचिएको थियो । उक्त भिडियो देश बाहिरबाट प्रशारण गरिएको छ । उक्त भिडियो सार्वजनीक भएपछि अमृतपाल नेपालमा लुकेको आशङ्का गरिएको छ । स्रोतका अनुसार सिंह नेपालगन्जमा लुकेर बसेको आशङ्का गरिएको छ ।

प्रहरी, राष्ट्रिय अनुसन्धान विभाग र सशस्त्र प्रहरीले नेपालगन्जमा खोजी तीव्र बनाएका छन् । गृह मन्त्रालयका एक जना उच्च अधिकारी भन्छन्, ‘सुरक्षा निकायहरूले खाजी जारी राखेका छन्, नेपालगन्जमा लुकेको आशङ्का गरिएको छ ।’ अमृतपाल सिंह नेपाल आएकोबारे प्रहरीलाई जानकारी नभएको बताउँछन् प्रहरी प्रवक्ता (डीआइजी) पोषराज पोखरेल ।

पोखरेल भन्छन्, ‘आएको थाहा पाएका छैनौँ तर, हामी सचेत छौँ ।’ भारतीय दूतावासले नेपाल सरकारलाई लेखेको पत्रमा अमृतवालविरुद्ध भारतमा लुक आउट सर्कुलर जारी भएको भनिएको छ । भारतीय प्रहरीले भने क्यानडा, बेलायत र दुबईका तीन वटा आइपी ठेगाना पत्ता लगाएको छ । यी देशबाट भिडियोहरू इन्टरनेटमा राखिएका थिए ।

अमृतपालले बुधबार जारी भिडियोमा भनेका छन्, ‘म गिरफ्तारीसँग डराउँदिन। वाहेगुरुको कृपाले मार्च १८ मा बचेर निस्किएँ । कसैले कपाल पनि हल्लाउन सकेन । अकाल तख्तका जथेदारले वैशाखीको दिन तख्त श्री दमदमा साहिब, तलवंडी साबो, भटिंडामा सर्वत खालसा बोलाउनुहोस् । भिडियोमा अमृतपाल सिंहले सरबत खालसा बोलाउन आग्रह गरेका छन् ।

गत २७ मार्चमा भएको सिखको बैठकमा उनले गाउँगाउँमा यस्ता भेटघाटको कुनै फाइदा नभएको भन्दै जनता समझदार भएको बताए । यसअघि सन् २०१५ मा सरबत खालसा बोलाइएको थियो । पञ्जाबमा बढ्दो अपवित्र घटनाहरू पछि, धेरै धार्मिक र सामाजिक कार्यकर्ता समूहहरू भेला भएका थिए र यो सरबत खालसा बोलाए ।

सन् २०१५ मा सरबत खालसा बोलाउन सक्रिय रहेका जर्नेल सिंह सखिराले एक अन्तर्वार्तामा भनेका थिए, ‘अमृतपालको आदेशमा मात्र सरबत खालसा बोलाउन सकिँदैन । त्यो पनि ब्यक्तिको इशारामा, जसको पछाडी प्रहरी संलग्न छ । सरबत खालसा सिखहरूको सबैभन्दा ठूलो सभा हो जसमा लाखौं सिखहरू सहभागी हुन्छन् र महत्वपूर्ण निर्णय गरिन्छ ।’

चौतर्फी दबाबपछि अब अमृतपालको आत्मसमर्पणको अड्कलबाजी भइरहेको छ । उनले अमृतसरको स्वर्ण मन्दिरमा रहेको श्री अकाल तख्त साहिबमा आएर आत्मसमर्पण गर्न सक्ने चर्चा थियो । यो थाहा पाउनासाथ प्रहरीले त्यहाँ कडा सुरक्षा व्यवस्था गरेको थियो । यसपछि उनले तख्त श्री दमदमा साहिब, तलवंडी साबो, भटिण्डामा आत्मसमर्पण गर्न सक्ने जानकारी आयो ।

प्रहरी स्रोतका अनुसार अमृतपालले आत्मसमर्पणका लागि तीन सर्त राखेका छन् जसमा उनलाई कुटपिट नगर्न, पञ्जाब जेलमा राख्न र आत्मसमर्पणलाई पक्राउको रूपमा नदेखाउन भनिएको छ । अकाल तख्तका जथेदार ज्ञानी हरप्रीत सिंह पनि तलवंडी साबोमा छन्। त्यहाँ पनि प्रहरीको कडा सुरक्षा थियो । एसएसपी भटिण्डा गुलनीत खुरानाले तलवंडी साबो पुगेर जथेदार ज्ञानी हरप्रीत सिंहलाई पनि भेटेका थिए ।