नेपाल प्रहरीमा ३० औं प्रहरी महानिरीक्षक नियुक्तिको तयारीमा सरकार जुटेको छ । गत साता एआइजी बढुवाको सिफारिस भएसँगै आइजिपी नियुक्तिको प्रतिस्पर्धा साँघुरिएको छ । प्रहरी महानिरीक्षक धिरजप्रताप सिंहकै सिफारिस अनुसार बरियतामा अगाडि रहेका पाँच डिआइजी बढुवा सिफारिस भएका छन् ।
बसन्तबहादुर कुँवर, टेकप्रसाद राई, दिपक थापा, श्यामलाल ज्ञवाली र किरण बज्राचार्य एआइजी बढुवामा सिफारिस भएका हुन् । बढुवामा सबै अब्बल परेकाले विगतमा जस्तो कुनै विवाद भएन । प्रहरीमा सेवाहद सम्बन्धी प्रावधान हेरफेर नभएमा उनीहरुमध्ये एक जना १० चैतमा प्रहरी महानिरीक्षक हुनेछन् ।
पहिलो नम्बरमा बढुवा भएकाले कुँवर आइजिपीका बलिया दाबेदार देखिएका छन् । यसअघि डिआइजी बढुवामा १३ नम्बरबाट एक नम्बरमा फड्को मार्नु नै उनको करिअरको कोशेढुंगा बन्यो । एआइजी बढुवामा पनि एक नम्बरमै रहन सफल भए । यसका लागि प्रहरी महानिरीक्षक सिंहको भूमिका महत्वपूर्ण छ ।
सिंहले कुँवरलाई नै भावी आइजिपीका रुपमा अघि बढाउन चाहेका छन् । कांग्रेस निकट भनेर चिनिए पनि कुँवर व्यवसायिक प्रहरी अधिकृत मानिन्छन् । तर, प्रधानमन्त्री पुष्पकमल दाहाल ‘प्रचण्ड’सँग निकटता नभएकाले उनी आइजिपीको कुर्सीमा पुग्नेमा ढुक्क छैनन् । दोस्रो नम्बरमा राई पनि इमान्दार छवी भएका अधिकृत हुन् ।
लामो समय बिशेष ब्यूरोमा बसेर उनले सशस्त्र हिंसा तथा संगठित अपराधको नियन्त्रणमा देशका लागि महत्वपूर्ण भूमिका निभाए । तर, राजनीतिक नेतृत्वको चाकडी नगर्ने स्वभावका कारण उनलाई नेताहरुले रुचाउँदैनन् । तेस्रो नम्बरका दिपक थापा अर्का बलिया दाबेदार हुन् । तर, एआइजी बढुवामा तेस्रो नम्बरमा परेकाले उनलाई प्रधानमन्त्रीले अघि बढाउन नखोजेको चर्चा प्रहरीमा छ ।
यद्यपि, उनको प्रचण्ड परिवारसँग निकटतम सम्बन्ध छ । अहिले आइजिपी नभएपनि पछि छोटो समयका लागि आइजिपी हुने सम्भावना बाँकी नै भएकाले पनि उनलाई विकल्प भने छ । चौथो नम्बरका श्यामलाल ज्ञवाली पनि अब्बल प्रहरी अधिकृत मानिन्छन् । तर, उनको माओवादी तथा कांग्रेस नेतृत्वसँग निकटतम सम्बन्ध छैन भनिन्छ ।
साथै, यसपटक आइजिपी नियुक्तिमा इतिहास कायम गर्ने अवसर पनि प्रधानमन्त्री प्रचण्डलाई छ । पहिलो पटक महिलालाई आइजिपी बनाउने अवसर पनि सरकारलाई छ । पाँचौ नम्बरमा बढुवा सिफारिस भएकी किरण बज्राचार्य आइजिपी पदकी एक प्रमुख हकदार हुन् । यसअघि उत्कृष्ट पुरस्कारहरु पाएकी उनी क्षमतावान महिला अधिकृतका रुपमा चिनिन्छन् । उनी पनि प्रहरीमा इतिहास रच्ने दाउमा छिन् ।
यो ब्याचका पाँचै जना तुलनात्मक रुपमा अब्बल अधिकृतका रुपमा पहिचान बनाएका छन् । त्यसकारण पाँचमध्ये जसलाई आइजिपी बनाए पनि विवाद हुने देखिन्न । अघिल्लो कार्यकालमा आइजिपी कान्डमा फसेका प्रचण्ड यसपटक प्रहरीमा राजनीति गर्ने पक्षमा नरहेको उनी निकटस्थहरु बताउँछन् । यद्यपि, सेवाहदसम्म प्रावधान हेरफेर गरेर अहिलेकै नेतृत्वलाई निरन्तरता दिने विषयमा पनि छलफल चलिरहेको छ ।
सत्यपाटी संवाददाता । काठमाडौं