काठमाडौंको सुन्धारास्थित निर्माणाधीन धरहराको पाँचौँ पटक म्याद थप्ने तयारी गरिएको छ । निर्माण कम्पनी जीआईईपीसी–रमन–कन्ट्रक्सनले पाँचौँ पटक म्याद थपको माग गरेको हो ।

ठेकेदार कम्पनीको ढिलासुस्तीका कारण पुनर्निर्माणको काम कहिले सकिने भन्ने टुंगो छैन । ठेकेदार कम्पनीका प्रोजेक्ट म्यानेजर सञ्जय नकर्मीले म्याद थपका लागि माग गरिएकाले पुनर्निर्माणबारे अहिले बोल्न नमिल्ने बताए ।

‘अहिलेसम्म चार पटक म्याद थप भइसकेको छ । पाँचौँ पटक म्याद थप गर्नका लागि सहरी विकास तथा भवन निर्माण विभाग अन्तर्गतको केन्द्रीय आयोजना कार्यान्वयन एकाइ भवन तथा आवास कार्यालयलाई निवेदन दिइसकिएको छ,’ नकर्मीले भने ।

पुनर्निर्माण नसकिँदै धरहराका जडान गरिएका लिफ्ट पनि जीर्ण बन्दै गएका छन् । धरहराको तल–माथि आवतजावत गर्न दुईवटा लिफ्ट जडान गरिएको थियो । दुवै लिफ्ट जाम भएका छन् । ०७२ साल वैशाख १२ को भूकम्पले धरहरा क्षतिग्रस्त बनेको थियो ।

त्यसपछि ०७२ फागुन ४ गते धरहरा पुनर्निर्माणका लागि तत्कालीन प्रधानमन्त्री केपी शर्मा ओलीले ‘मेरो धरहरा, मै बनाउँछु’ अभियान चलाएका थिए । त्यसपछि धरहरा पुनर्निर्माणका लागि ०७५ पुस ५ गते ओलीले धरहराको शिलान्यास गरेका थिए ।

धरहरा पुनर्निर्माणको जस लिनकै लागि ओलीले ०७८ वैशाख ११ गते उद्घाटन गरेका थिए । पुनर्निर्माण नसकिँदै उद्घाटन गरेपछि ओलीको चर्को आलोचना भएको थियो । आउँदो वैशाख ११ गते उद्धघाटनको दुई वर्ष बित्दैछ ।

तर, पुनर्निर्माणको काम सकिने कुनै संकेत छैन । धरहरा पुनर्निर्माणको काम अहिलेसम्म वित्तीयतर्फ ७० प्रतिशत र भौतिकतर्फ ८० प्रतिशत मात्रै सम्पन्न भएको ठेकेदार कम्पनीले जनाएको छ । यसअघि चौथो पटक थपिएको म्याद चैत मसान्तमा सकिँदैछ ।

ठेकेदार कम्पनीका अनुसार अहिलेसम्म धरहरा पुनर्निर्माणमा दुई अर्ब १२ करोड रुपैयाँ खर्च भइसकेको छ । राष्ट्रिय पुनर्निर्माण प्राधिकरणको नेतृत्वमा धरहरा पुनर्निर्माणका लागि तीन अर्ब ४८ करोड रूपैयाँमा ठेक्का सम्झौता भएको थियो ।

सम्झौता बमोजिम ०७७ सालमै पुनर्निर्माण सकिनुपर्ने थियो । तर, कोरोना महामारीलगायतलाई कारण देखाउँदै पटकपटक म्याद थप हुँदै आएको छ । केही महिना पहिले सुनधाराको ऐतिहासिक डुँडमा ठेकेदार कम्पनीको डोजर चलेपछि करिब एक महिना पुनर्निर्माणको काम ठप्प भएको थियो ।

स्थानीय र काठमाडौं महानगरपालिकाका जनप्रतिनिधिहरूले ठेकेदार कम्पनीले सुनधारा बनाउन नसक्ने भन्दै विरोध नै गरेका थिए । हाल ठेकेदार कम्पनीले म्याद थप्नुपर्ने भन्दै धरहरा पुनर्निर्माणको गति सुस्त बनाएको छ । ४२ रोपनी क्षेत्रफलमा फैलिएको धरहरा बाहिरबाट हेर्दा ११ तलाको देखिन्छ । तर, भित्रबाट २२ तलाको छ ।