ढोरपाटन शिकार आरक्षमा वर्षको दोस्रो सिकार याम सुरुआत भएको छ । आगामी शिकार याम (२०७९ फागुन–२०८० वैशाख)का लागि ढोरपाटनमा शिकार गर्न इच्छुकबाट प्रस्ताव आह्वान भएसँगै सिकार आरक्ष शिकार पर्यटकको पर्खाइमा छ ।

राष्ट्रिय निकुञ्ज तथा वन्यजन्तु संरक्षण विभागले बिहीबार प्रतिस्पर्धाबाट शिकार गराउन दरभाउ पत्र आह्वान गरेको हो । पन्ध्र दिनभित्र पेस हुने प्रस्तावबाट बढीबढाउका आधारमा शिकार कम्पनीले नाउर, झारल र वनेलको शिकार अनुमति पाउने छन् ।

विभागका अनुसार आरक्षमा तोकिएको ब्लक र निर्धारण गरिएको कोटाका आधारमा प्रतिस्पर्धाबाट नाउर, झारल र वनेलको शिकार गरिने भएको छ । यसका लागि व्यक्ति तथा सङ्घ संस्थाले निवेदन दिनसक्ने विभागले जनाएको छ ।

आरक्षमा यस आव २०७९–०८० को दोस्रो यामका लागि १२ नाउर आठ झारलको शिकार कोटा तोकिएको छ । यस सिजनमा नेपाली नागरिकका लागि ७ वनेल र विदेशी नागरिकका लागि चार वनेल गरी जम्मा ११ वटा वनेल शिकार कोटा तोकिएको आरक्षका प्रमुख संरक्षण अधिकृत वीरेन्द्र कँडेलले बताए ।

ढोरपाटन नेपालको एक मात्र शिकार आरक्ष हो । यहाँ कात्तिक–मङ्सिर र फागुन–वैशाख गरी दुई सिजनमा शिकारको अनुमति दिइन्छ । आरक्षले शिकारको अनुमति दिएको सङ्ख्या, पर्यटक र उनीहरुको गतिविधिलाई नियमनको काम गर्छ । नेपालमा दुई सिजनामा गरी सामान्यतया दुई दर्जन नाउर र एक दर्जन झारलको शिकार हुने गरेको छ ।

आरक्षमा कूल छ वटा ब्लक रहेका छन् । ब्लकअनुसार मूल्य फरकफरक पर्छ । पर्यटकले सिकार गरेको जनावरको सिङ, छाला, खप्परजस्ता अङ्ग भने आफ्नो मुलुक लैजान पाउँछन् । विभागले यस वर्षको पहिलो शिकार यामका लागि आठ नाउर र पाँच वटा झारलको शिकार अनुमति दिएको थियो । तीमध्ये पाँच नाउर र चार झारलको मात्रै शिकार भएको थियो ।

अघिल्लो सिकार याममा शिकार हुन नसकेका नाउर र झारल समेतलाई थप गरेर वर्षको दोस्रो याममा शिकार अनुमति दिन लागिएको हो । पहिलो सिकार याममा कुनै पनि नेपाली र विदेशीले शिकारका लागि चासो नदेखाए पनि दोस्रो याममा वनेलको शिकारका लागि प्रस्ताव आह्वान गरिएको छ ।

‘अनुमति लिएका विदेशीले निःशुल्क वनेलको शिकार गर्न पाउँछन्, नेपालीलाई पनि सामान्य शुल्क लिएर शिकारका लागि अनुमति लिन प्रस्ताव आह्वान गरिए पनि अहिलेसम्म कोही पनि अनुमति लिन आएका छैनन्,’ उनले भने, ‘आशा गरौँ यो मौसममा पनि शिकार हुनेछ ।’

आरक्षमा रहेका वनेल आसपासका बस्तीमा पसेर किसानको बाली मास्ने गरेका छन् । आरक्षमा वनेलको सङ्ख्या उच्च रहेपनि शिकारले चासो नदेखाएका हुन् । माग बढी हुँदा राजस्वको दर पनि बढ्ने र माग घट्दा राजस्व घट्ने गरेको छ ।