सुर्खेत वीरेन्द्रनगरको मध्य भागमा अवस्थित घडी भवन अर्थात् घण्टाघर । यसका पूर्व, पश्चिम, उत्तर र दक्षिण चारैतिर वर्गाकार घडी । समय दिन्छन् तर गलत दिन्छन् । १२ वर्ष अघिसम्म घण्टाघरमा जति बज्यो त्यतिपल्ट धुन बज्थ्यो र घडीको सुई सर्दथ्यो । त्यसयता घडीका सुई घुम्दैनन् ।

वीरेन्द्रनगरको पहिचानका रूपमा रहेको घण्टाघरको चार वटै घडी बिग्रिएका छन् । कुनै पनि घडीले समयको जनाउ दिँदैनन् । मर्मतमा कसैले ध्यान नदिँदा मिठो धुनसँगै समयको जनाउँ दिने यी घडी अहिले चल्दैनन् । १२ बर्षअघि घण्टाघरका घडीमा ‘टिङटिङ टिङटिङ’ आवाज आउथ्यो । सोही आवाज सुनेर कति बज्यो भनेर थाहा पाउँथे ।

बाटो हिँड्ने बटुवा, घण्टाघर हेर्न पुगेका पर्यटक र स्थानीयले समय सहजै थाहा पाउँथे । तर घण्टाघरको चार दिशामा रहेका चार वटा घडीका सुइँले १२ बर्षदेखि कहिल्यै समय फेरेका छैनन् । घडी सधैं स्थीर छन्, सुइँ जाम भएर समय सधैं उही देखाइरहेका छन् । यहाँ रहेका चार वटै घडीले १०ः५० को समयमात्र देखाउँछन् । घण्टाघर रहेको स्थानमा पार्क छ ।

घण्टाघरको माथिबाट वीरेन्द्रनगर उपत्यकाको ९० प्रतिशत भू–भाग दृश्यावलोकन गर्न सकिन्छ । विसं २०७४ मा निर्वाचित स्थानीय जनप्रतिनिधिले पाँच बर्षे कार्यकाल बिताइसके । उनीहरुले पनि घण्टाघरमा नयाँ घडी राख्न सकेनन् । यसपटकको स्थानीय तह निर्वाचनमा पनि मतदाताले ‘घण्टाघरको सुई कहिले घुम्छ ?’ उम्मेदवारसँग प्रश्न गरेकै हुन् ।

२०४५ सालमा चीन सरकारको सहयोगमा घण्टाघर निर्माण गरी जडान गरिएका चार वटा घडी बिग्रिएको वर्षौै भएको छ । प्रदेश मुकाम रहेको वीरेन्द्रनगर नगरपालिका–६, मा रहेको घण्टाघरका घडीले समय देखाउन छाडेपछि अहिले पर्यटकीय स्तम्भका रुपमा रहेको घण्टाघरकै पहिचान हराउन थालेको ६५ वर्षीय बेदुराम केसीले बताए ।

वीरेन्द्रनगर उपत्यकाको एक महत्वपूर्ण पर्यटकीय क्षेत्रको रुपमा रहेको घण्टाघरको सुई बन्द हुँदा घण्टाघरकै पहिचान सकिन थालेको बताउँदै केसीले भने, ‘नाम घण्टाघर भएर के गर्ने, घडीको सुई सर्दै सर्दैनन् । घडीमा टिङटिङ आवाज बजे कम्तीमा कति बज्यो भनेर आन्दाज त हुन्थ्यो । अहिले मोबाइलको जमाना भए पनि घडीको महत्व छुट्टै छ ।’

वीरेन्द्रनगर नगरपालिका–६, का ७१ बर्षिय लालबिर चपाईले पहिले साक्षर नभएका मानिसका लागि घण्टाघरका घडीको महत्व छुट्टै रहेको बताए । ‘घण्टाघरमा प्रत्येक घण्टामा धुन बज्थ्यो र घडीको सुई घुमेको थाहा हुन्थ्यो । घण्टाघरको सुई बन्द हुँदा घण्टाघरको पहिचान नै सकिने अवस्थामा पुगेको थियो । नयाँ घडी राख्ने कुरा सुनेको छु,’ उनले भने ।

उनका अनुसार यहाँको काँक्रेविहार, देउतीबज्यै र बुलबुलेपछि घण्टाघर नै पर्यटकीय गन्तव्य हो । ‘उतिबेला सबैले घडी किनेर लगाउन सक्दैन्थे । पहिला घडीको घण्टीले समयको अड्कल दिन्थ्यो, अहिले दिन र रात भन्ने मात्र आँकलन गर्न सकिन्छ,’ चपाईले भने, ‘घण्टाघरको घडीको ध्वनीले कुनै बेला बेग्लै आनन्द दिन्थ्यो ।’

अहिले सबैको हातहातमा घडी छन् । समय हेर्न मोबाइल फोन लगायत अन्य साधन पनि छन् । तर घण्टाघरको समय हेर्दाको सम्झना गर्नेहरू पनि उत्तिकै छन् । वीरेन्द्रनगर–१३ लामीडाँडाका छविलाल सार्कीले पहिले घण्टाघरका घडी राम्रोसँग चलेपनि लामो समयदेखि सबै घडी बन्द रहेको बताए ।

‘दिउँसो १२ बजे ठूलो धुुन सुनिन्थ्यो, अनि मात्र हामीले १२ बज्यो भनेर थाहा पाउँथ्यौं,’ उनले विगत सम्झिँदै भने, ‘बाटोमा हिँड्ने बटुवाले पनि घडीको धुन सुनेर कति बज्यो भन्ने थाहा पाउँथे ।’ घण्टाघरको संरक्षण गर्ने जिम्मा वीरेन्द्रनगर नगरपालिकाको भए पनि हालसम्म संरक्षणमा उचित ध्यान नदिँदा अस्तित्व नै संकटमा परेको उनले बताए ।

मजदुरी गर्नेहरूका लागि पनि घण्टाघरको सुई र घण्टी महत्वपूर्ण रहेको वीरेन्द्रनगर–६ कै बास्मती भण्डारीले बताइन् । ‘घण्टाघरले काम जाने र फर्कने समयको ख्याल हुन्थ्यो,’ उनले भनिन्, ‘घण्टाघरको सुई चल्दासम्म सुर्खेत बजारभरि आवाज सुनिन्थ्यो ।’ २०७७ सालमा परेको चट्याङले घण्टाघरको संरचनामा क्षतिसमेत पुर्याएको छ ।

भेरी नदीमा पक्की पुल निर्माण सकिएपछि त्यहाँ बचेको निर्माण सामग्रीबाट चीन सरकारले उपहारस्वरुप वीरेन्द्रनगरको मध्यभागमा घण्टाघर बनाइदिएको हो । घण्टाघर निर्माणपछि यहाँका पर्यटकीय गतिविधिले समेत फड्को मारेको केसीले बताए । नगरवासीले पटक–पटक घण्टाघरका घडी चलायमान गराउनुपर्ने माग राख्दै आएका थिए ।

त्यसो त घण्टाघर घुम्न आउने सयौं पर्यटकलाई त्यहाँ रहेका चार वटा घडीले कहिल्यै सही समय देखाएनन् । घण्टाघर हेर्न आउने सयौं पर्यटकहरु टावरमा चढेर सुर्खेत उपत्यका नियाल्दै खिन्न भएर प्रश्न गर्छन्, ‘यति राम्रो उपत्यका नियाल्न शिर चढाउने घण्टाघरका सुइँले कहिले चल्लान् र सही समय देखाउँलान् ?’

नगरबासीले राख्दै आएको उक्त माग भने अब पुरा हुने चरणमा देखिएको सुर्खेत उद्योग वाणिज्य सङ्घले जनाएको छ । सङ्घकै पहलमा वीरेन्द्रनगर नगरपालिकाले १२ लाख रुपैयाँको लागतमा पुराना घडी हटाएर नयाँ घडी जडानको काम गरिरहेको छ । घडी जडान भएपछि घण्टाघरका घडीले १२ वर्षपछि अब सही समय दिनेमा नगरबासी ढुक्क छन् ।

पुराना घडीहरू मर्मत सम्भार हुन नसकेपछि विदेशबाट नयाँ घडी मगाएर जडान कार्य सुरु भएको वीरेन्द्रनगर नगरपालिकाका प्रमुख प्रशासकीय अधिकृत नरहरि तिवारीले जानकारी दिए । उनका अनुसार नगरपालिकाले नयाँ घडी जडान गर्न प्राविधिक टोलीले घण्टाघरका पुराना घडीलाई विस्थापित गरी नयाँ जडान गर्ने तयारी गरेको हो ।

प्रमुख प्रशासकीय अधिकृत तिवारीले नयाँ घडी जडान गर्नका लागि प्राविधिक टोलीले तिव्रताका साथ काम गरिरहेको जानकारी दिए । घण्टाघरमा राखिने चार वटा घडी भारतबाट ल्याइएको र विश्वकै सबैभन्दा राम्रो कम्पनी अमेरिकन टेक्नोलोजीका घडी भएको पनि प्रमुख प्रशासकीय अधिकृत तिवारीको दावी छ ।

कुनै समय वीरेन्द्रनगर उपत्यकाकै एक प्रमुख विशेषताका रुपमा रहेको घण्टाघर सुर्खेत जिल्लाको प्रमुख पर्यटकीयस्थल मात्र नभई कर्णाली प्रदेशकै पहिचानका रूपमा विकास गर्न सकिने स्थानीयहरु बताउँछन् । पर्यटकीय गन्तव्यका रुपमा रहेको घण्टाघर पार्क यहाँ घुम्न आउनेका लागि पहिलो गन्तव्यका रुपमा समेत रहेको छ ।