सर्वोच्च अदालतले ‘टीकापुर घटना’को मुद्दाको पूर्णपाठ सार्वजनिक गरेको छ । पूर्णपाठ सार्वजनिक भएसँगै नेपाली राजनीतिमा नयाँ तरंग पैदा भएको छ । पूर्णपाठमार्फत सर्वोच्चले उक्त घटनालाई ‘क्रुर, अमानवीय र सभ्य समाजमा सोच्नै नसकिने खालको घटना’ भनेको छ भने रेशम चौधरीको नेतृत्वमै टीकापुर घटना भएको ठहर गरेको छ ।
नागरिक उन्मुक्ति पार्टीका संरक्षक एवं पूर्वसांसद रेशम चौधरीले गणतन्त्र दिवसको अवसरमा गत जेठ १४ गते राष्ट्रपतिबाट आममाफी पाएका थिए । सर्वोच्चको फैसलापछि रेशमले पाएको आममाफीमै प्रश्न उठेको छ । पूर्वसांसद रेशम यतिखेर अफ्रिका भ्रमणमा छन् । अफ्रिकाबाटै सर्वोच्चले सार्वजनिक गरेको पूर्णपाठले अत्यन्तै मर्माहत बनाएको प्रतिक्रिया दिएका छन् ।
उनले भने, ‘सर्वोच्चले सर्वजनिक गरेको पूर्णपाठले अत्यन्तै मर्माहत बनाएको छ । क्षतविक्षत बनाएको छ । हामीले सम्मान गरेका थियौँ, बदलामा अपमान मात्र पाउँदै आएका छौं । हामीले न्याय पाउन सकेनौं ।’ सर्वोच्चको पूर्णपाठले रेशम चौधरीलाई टीकापुर घटनाको मुख्य नेतृत्व भएको ठहर नै गरेको छ ।
तर, बारम्बार घटना भएको दिन आफू त्यहाँ नरहेको भन्दै आएका उनले सर्वोच्चको पूर्णपाठ पछि पनि आफू त्यस घटनाको नेतृत्वकर्ता नभएको दोहोर्याएका छन् । चौधरीले भने, ‘टीकापुरको आन्दोलन उत्पीडन विरुद्धको संघर्ष थियो । नागरिक स्वतः संघर्षमा उत्रेका थिए । म या अरु कसैले नेतृत्व गर्नुपर्ने वा उतार्नुपर्ने अवस्था थिएन ।’
चौधरीले थप भनेका छन्, ‘त्यो घटनाको दिन म त्यहाँ थिइनँ । म त्यहाँ नभएको अनेकौँ तथ्य र प्रमाणहरु छन् । तथ्य र प्रमाणहरुलाई अनदेखा गरेर मलाई नै दोष्ीा देखाइनुले अन्यायको सीमा नाघ्यो । यसले राम्रो परिणाम दिँदैन ।’ राज्यले बारम्बार अन्याय गरेर पलपलमा मारिरहेको भन्दै चौधरीले यस्तो यातनाभन्दा मृत्युदण्ड सयौं गुणा सहज हुनेसमेत प्रतिक्रिया दिएका छन् ।
उनले भने, ‘अपमान र अन्यायले सीमा नाघ्यो । हामीलाई पलपलमा मारियो । यसरी अन्याय र अपमानले पलपलमा मारिनुभन्दा बरु एकैपटक मृत्युदण्ड दिएर मार्नु उचित हुन्छ । म याचना गर्छु– बरु मृत्युदण्ड दिएर मार हामीलाई, त्यो मृत्यु सहज हुनेछ ।’
केन्यामा रहेका चौधरीले केही दिनमै पार्टीको केन्द्रीय समिति बैठक बस्ने र अन्यायविरुद्ध कठोर संघर्षको बाटो तय गर्ने प्रतिक्रिया दिएका छन् । उनले भने, ‘म भोलि नै स्वदेश फर्कदैछु । २–४ दिनमै केन्द्रीय समितिको बैठक बसेर कठोर संघर्षको कार्यक्रम तय गर्छौै । हामी अब सहेर बस्ने अवस्थामा छैनौं । अन्याय र अपमानले सीमा नाघ्यो ।’
सत्यपाटी संवाददाता । काठमाडौं