सुरिलो स्वरकी धनी बागलुङकी सिम्रन परियारको गित ट्रेन्डिङ वानमा परेको छ । सिम्रनको पहिलो रेकर्ड गीत ट्रेन्डिङ वानमा उक्लिएसँगै उनी झनै चर्चामा छिन् ।

गायक प्रमोद खरेलको स्वरको ‘उसलाई पाउन २’ को फिमेल भर्सन शुक्रबार सार्वजनिक भएको थियो । सुनिल बिसी युट्युब च्यानलबाट सार्वजनिक उक्त गीत राम्रो भ्युजका कारण ट्रेन्डिङ वानमा पुगेको हो ।

यो गीत हालसम्म ११ लाखले हेरिसकेका छन् । गाउँदेखि काठमाडौँको मारुनी डिजिटल स्टुडियोमा गीत रेकर्ड गराउने चाँजोपाँजो मेचीकाली खबरका सञ्चालक भोजराज थापाले मिलाइदिएका थिए । थापा सिम्रनको अन्तर्वार्ताका लागि केही दिनअघि बागलुङ पुगेका थिए ।

विकास प्रसाईंको भिडियोमा एरेन्ज विशाल निरौलाले गरेका छन् । कम्पोजर सुनिल बिसी आफैँले गीत लेखेका हुन् । आफ्नो स्वरको फिमेल भर्सनमा देखिएकी सिम्रनलाई गायक प्रमोदले शुभकामना दिँदै सफल सांगीतिक यात्राको कामना गरे ।

उनले सिम्रनलाई म्युजिक क्लास ज्वाइन गर्न र पढाइ नबिगार्न आग्रह गरे । प्रमोदका फ्यान भएको बताउँदै सिम्रनले उनकै गीत पहिलोपल्ट रेकर्ड गर्न पाएकोमा खुसी व्यक्त गरिन् । सिम्रनले गाएको अर्को गीत ‘मुटुमै घाउ छ’ शनिबार रिलिज भएको छ ।

श्रीधर अधिकारीको संगीतसँगै निर्देशनमा डा.विष्णुमूर्ति भट्टराईको शब्दको उक्त गीत श्रीधर अधिकारी युट्युब च्यानलमार्फत सार्वजनिक भएको छ । यो गीत २९ हजारले हेरिसकेका छन् । यतिबेला सिम्रनलाई यतिबेला टेलिसिरियलसँगै विभिन्न गीतका लागि अफर आएको बताइएको छ ।