डोल्पामा ट्याक्टर दुर्घटनामा परी सात जना घाइते भएका छन् भने दुई जनाको अवस्था गम्भीर भएको छ ।

जिल्लाको ठुलीभेरी नगरपालिका अन्तर्गत पर्ने मोतिपुरमा ठुलीभेरीको भित्तिबाट बालुवा बोकेर दुनैतर्फ आउँदै गरेको रा १ त ३५७८ नंम्बरको ट्याक्टर शनिबार साँझ दुर्घटना भएको हो ।

जिल्ला प्रहरी कार्यालय डोल्पाका प्रहरी निरीक्षक नवीन प्रकाश चापागाईंका अनुसार घाइतेहरुको जिल्ला अस्पताल दुनैमा उपचार भइरहेको छ ।

दुई जनाको अवस्था भने अत्यन्त गम्भीर रहेको प्रहरीले जनाएको छ । ट्याक्टर चालक सुरज बोहराले भित्तिमा अत्यधिक मात्रामा मादक पदार्थ सेवन गरेर चलाएकाले दुर्घटना भएको प्रारभ्मिक अनुसन्धानमा खुलेको प्रहरीको भनाइ रहेको छ ।