हास्य कलाकार राजु पौडेल उर्फ राजु मास्टरले आइतबार बेलुका नयाँ टिभी शृङ्खला ‘लफडा’को घोषणा गर्दै ट्रेलर सार्वजनिक गरेसँगै बल्छी ध्रुवे भनेर चिनिने मरिचमान श्रेष्ठसँगको सहकार्यमा दरार आएको अनुमान गरिएको छ ।

वान–एक्स बेट प्रकरणमा झन्डै महिनादिन हिरासत परेको उनीहरुबीच अहिले सम्बन्धमा चिसोपना आएको आँकलन छ । भदौदेखि प्रसारण हुने बताइएको राजु मास्टरको नयाँ टेली शृङ्खलामा उनका हितैषी बल्छी ध्रुवे सहभागी छैनन् ।

हास्य कलाकार राजु पौडेल उर्फ राजु मास्टरले घोषणा गरेको नयाँ टिभी शृङ्खला ‘लफडा’को ट्रेलर

लामो समयदेखि सहकार्य गरिरहेका बल्छी ध्रुवे विनै राजु मास्टरले नयाँ शृङ्खलाको घोषणा गरेपछि यी दुईबीचको व्यावसायिक सहकार्यमा ‘दरार’ आएको हल्ला चलेको छ । किनकि आइतबारै साँझ प्रसारित हल्का रमाइलो सिरियलमा पनि राजु मास्टर देखिएका छैनन् ।

राजु मास्टरसँगै अनिता बस्नेत लगायतको सीन छैन । उता राजु मास्टरले ट्रेलर सार्वजनिक गरेको लफडा नामक सिरियलमा पनि बल्छी ध्रुवे देखिएका छैन । यसअघि हास्य श्रृखला हल्का रमाइलो र धारावाहिक टेलिफिल्म जुठेमा यी दुवै जना हुन्थे ।

आइतबार साँझ प्रसारित हल्का रमाइलो सिरियलको एक सीन

वान–एक्स बेट प्रकरणमा रिहा भएपछि बल्छी ध्रुवेले टिभी सिरियल ‘हल्का रमाइलो’लाई एक्लै ल्याइरहेका छन् । बल्छीले एक्लै अभिनय र निर्देशन गरेपछि सहकार्यमा दरार आएको चर्चा सामाजिक सञ्जालमा चल्न सुरु भइसकेको थियो ।

आफूहरूको व्यक्तिगत सम्बन्धलाई लिएर गलत कुरा सम्प्रेषण नगर्न समेत दुवैले आग्रह गरेका छन् । चाँडै दुवैले संयुक्त भिडिओ बनाएर दर्शकलाई आश्वस्त तुल्याउने पनि उनीहरूले बताएका छन् ।