नेपालगन्ज नाका भएर आर्थिक वर्ष २०७९–०८० मा १४ करोड रुपैयाँ बढीको प्लाइउड भारततर्फ निकासी भएको छ ।

नेपालगन्ज भन्सार कार्यालयको तथ्याङ्क अनुसार गत आवमा १४ करोड १२ लाख ५४ हजार रुपैयाँ मूल्यको प्लाइउड भारततर्फ निकासी भएको हो । नेपालगन्जमा रहेका विभिन्न उद्योगहरूले उत्पादन गरेको प्लाइउड भारत निकासी गर्दै आएका छन् । आर्थिक वर्ष २०७८–००७९ मा गत आवमा धेरै मूल्यको प्लाइउड भारततर्फ निकासी भएको छ ।

भन्सार कार्यालय नेपालगन्जका सूचना अधिकारी भन्सार अधिकृत डिल्लुप्रसाद शर्माका अनुसार आव २०७८–०७९ मा ८० लाख ३९ हजार रुपैयाँ मूल्य बराबरको प्लाइउड भारततर्फ निकासी भएको थियो । प्लाइउड भारततर्फ धेरै परिमाण र मूल्यको निकासी हुने नेपाली वस्तुको चौथो नम्बरमा रहेको छ । नेपालगन्ज नाकाबाट जडीबुटी, खोटो रोजिन र खयर कत्था धेरै निकासी भएको छ ।

पछिल्लो समय नेपाली प्लाइउडको भारतमा अत्यधिक माग बढेको बाँकेको जानकी गाउँपालिका–३ इन्द्रपुरमा रहेको प्लाइउड उद्योग मिडलाज ग्रुपका अध्यक्ष तथा प्रमुख कार्यकारी रिहान मियाले जानकारी दिए । मियाले भने, ‘केहीसमय अघिसम्म उत्पादन थन्किएपछि बैङ्कको किस्ता कसरी तिर्ने भन्ने चिन्ता थियो, अहिले भारत जान थालेपछि समयमै कसरी सामान दिने भन्ने चिन्ताले सताउने गरेको छ ।’

नेपाली व्यवसायीहरूका अनुसार अहिले भारतको प्रयागराज सहित कानपुर, लखनउ, आग्रा, बहराईच, नानपारा लगायतका सहरहरूबाट व्यवसायीहरू आफैँ नेपाली प्लाइउड खरिदका लागि पुग्ने गरेका छन् । भारतीय व्यापारीहरूको रोजाइमा २९ जातबाट तयार पारिएको प्लाइउड, ढोकाहरू पर्न थालेका छन् ।