घरजग्गाको कारोबारमा कमी भएपछि बाँकेका स्थानीय तहमा गत आर्थिक वर्ष २०७९–०८० मा राजस्व बाँडफाँड शीर्षकमा भूमिसुधार तथा मालपोत कार्यालय बाँकेबाट प्राप्त हुने आम्दानी करिब दोब्बरले घटेको छ ।

भूमिसुधार तथा मालपोत कार्यालय बाँकेका प्रमुख छविलाल नेपालीका अनुसार गत आवमा राजस्व बाँडफाँट शीर्षकमा बाँकेका स्थानीय तहले करिब ४३ करोड रुपैयाँ प्राप्त गरेका छन् । गत आवको साउनदेखि जेठसम्म ३९ करोड ५८ लाख ६२ हजार रुपैयाँ र असारमा करिब तीन करोड बढी रुपियाँ स्थानीय तहलाई पठाइएको कार्यालयले जनाएको छ ।

आर्थिक वर्ष २०७८–०७९ मा ७६ करोड ५८ लाख रुपैयाँ राजस्व बाँडफाँट शीर्षकमा पठाइएको कार्यालय प्रमुख नेपालीले बताए । कार्यालय प्रमुख नेपालीले भने, ‘आर्थिक मन्दी लगायतका कारण घरजग्गाको कारोबारमा कमी भएपछि मालपोतको समग्र राजस्व सङ्कलनमा कमी भएको छ ।’

गत आवमा विश्वब्यापी आर्थिक मन्दीसँगै निर्वाचन, कित्ताकाट रोकिएको, स्थानीय तहले जग्गाको वर्गीकरण गर्नुपर्ने, बैंकिङ कारोबारमा कडाइका कारण राजस्व सङ्कलनमा कमी आएको छ । राजस्व बाँडफाँट शीर्षकमा स्थानीय तहमा जग्गाको रजिष्ट्रेशनबापत प्राप्त हुने राजस्वको ६० प्रतिशत सम्बन्धित स्थानीय तहले र ४० प्रतिशत प्रदेश सरकारले प्राप्त गर्ने व्यवस्था छ ।

बाँकेमा यसरी सबैभन्दा बढी राजस्व प्राप्त गर्नेमा नेपालगन्ज उपमहानगरपालिका र कोहलपुर नगरपालिका छन् भने कम राजस्व प्राप्त गर्नेमा नरैनापुर, डुडुवा, जानकी र राप्तीसोनारी गाउँपालिका छन् । मालपोत कार्यालयले गत आवमा पुँजीगत लाभकर शीर्षकमा २३ करोड ३२ लाख ८० हजार ९१५ रुपैयाँ राजस्व सङ्कलन गरेको छ । यसैगरी, आव २०७८–०७९ भन्दा आव २०७९–०८० मा करिब ६ प्रतिशत कम लिखत पास भएका छन् ।