सशस्त्र प्रहरी बलमा इन्सपेक्टरको पहिलो ब्याचको पहिलो नम्बरमा अधिकृत हुन् अञ्जनीकुमार पोखरेल । हाल बराह बाहिनी सुनसरीका बाहिनीपति रहेका उनी पढाई–लेखाईमा अब्बल अधिकृत मानिन्छन् । सोही कारण लामो समय संयुक्त राष्ट्रसंघको मुख्यालयमा बसेर काम गर्ने अवसर पाए ।

तर, फिल्डमा भने उनी कमजोर देखिएका छन् । एक साताअघि झापामा सशस्त्र प्रहरीका कर्मचारी सहकर्मीबाटै कुटिएको घटनाले उनको कमाण्ड क्षमता कमजोर देखिएको छ । जून घटनाले उनको करिअरमै धक्का लाग्ने सम्भावना छ । घटनाको विषयमा एआइजीकै नेतृत्वमा उच्चस्तरीय छानबिन समिति गठन भएपछि डिआइजी पोखरेल समस्यामा परेका हुन् ।

बाहिनीबाट डिआइजी पोखरेलले नै खटाएका इन्सपेक्टर नमप्रभात राई नेतृत्वको टोलीले झापाको सीमा क्षेत्रमा कार्यरत सशस्त्र प्रहरीमाथि कुटपिट गरी यातना दिएका थिए । कुटपिट गर्ने इन्सपेक्टर राई लगायत टोलीलाई निलम्बन गरी यतीबेला छानबिन भइरहेको छ । प्रारम्भिक छानबिनमै यो घटनामा बाहिनीको गल्ती देखिएको छ ।

एकातर्फ संगठनको नीतिविपरीत डिआइजी पोखरेलले इन्सपेक्टरको नेतृत्वमा सादा पोशाकमा प्रहरी खटाएका थिए । अर्काेतर्फ राम्रोसँग डिउटी नगरेको भन्दै कुट्ने र खोलामा डुबाउने काम भयो । अनुगमनका लागि खटाइएको अवस्थामा कसैले गल्ती गरेमा विभागीय कारबाही गर्ने नियमावलीमा उल्लेख छ ।

तर, जिल्लाका एसपी तथा बिओपी इन्चार्जसँग समेत समन्वय नगरी भएको कुटपिट सुरक्षा निकायभित्रको एउटा गम्भीर घटना हो । जसकारण डिआइजी पोखरेल समेत कारबाहीमा पर्ने सम्भावना देखिएको छ । अहिले कारबाहीमा परे पछि समस्या हुने भएपछि कारबाहीबाट जोगिन उनी दौडधुपमा छन् ।

खासगरी छानबिन समितिका एआइजी चन्द्र प्रकाश गौतमलाई फकाएर आफ्नो गल्ती लुकाउने प्रयासमा उनी लागेको स्रोत बताउँछ । एआइजी नेतृत्वको छानबिन समितिले यो प्रकरणमा पोखरेलमाथि पनि सोधपुछ गरेको छ । छानबिनमा आफुलाई कारबाहीबाट जोगाउन उनी लागिपरेका छन् ।

संगठनलाई निजी कम्पनी जसरी चलाउन खोजेको भन्दै यसअघिदेखि नै उनीविरुद्ध सशस्त्र प्रहरी अधिकारीले आक्रोश व्यक्त गर्दै आएका छन् । सशस्त्रका अर्का डिआइजी किशोर प्रधान भने दरबन्दी थपेर बढुवा हुने खेलमा लागेका छन् । प्राविधिक पृष्ठभूमीका उनी कमजोर कमाण्ड भएका अधिकृत मानिन्छन् ।

गृहमन्त्री नारायणकाजी श्रेष्ठ निकट व्यक्तिहरूसँगको मिलेमतोमा उनी दरबन्दी थप्न लागेको स्रोत बताउँछ । सशस्त्र प्रहरीको एकेडेमीमा एआइजीको दरबन्दी आवश्यक छ । तर, संगठनले पहल गर्दा थप हुन सकेको छैन । प्रधान आफ्नो लागि दरबन्दी थप्ने खेलमा रहेको सशस्त्र मुख्यालय स्रोतले बताएको छ ।