काभा अन्तर्राष्ट्रिय महिला भलिबल प्रतियोगितामा बुधबार नेपालले भारतको सामना गर्नेछ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा दिउँसो ३ बजे सुरु हुने यो खेलको विजेता टोली समुह विजेता बन्नेछ ।

नेपाल र भारत दुबै टोली प्रतियोगिताको सेमिफाइनलमा पुगिसकेका छन् । प्रतियोगितामा लगातार दुई जित निकाल्दै नेपाल र भारतले सेमिफाइनलमा स्थान पक्का गरेका हुन् ।

पहिलो खेलमा किर्गिस्तानलाई हराएको नेपालले मंगलबार भएको दोस्रो खेलमा बंगलादेशमाथि ३–० को सहज जित निकाल्यो । बंगलादेश विरुद्धको एकपक्षिय खेल नेपालले २५–१०, २५–८ र २५–९ को सेटमा जितेको हो ।

भारतले भने मंगलबार किर्गिस्तानलाई २५–१७, २५–८ र २५–८ ले हराएको थियो ।