विराटनगरमा एकजना व्यापारीमाथि खुकुरी प्रहार भएको छ । बिहीबार दिउँसो विराटनगर महानगरपालिका वडा नं १३ का ३२ वर्षीय व्यापारी राहुलकुमार रायमाथि खुकुरी प्रहार भएको प्रहरीले जनाएको छ ।

उनलाई विराटनगर–१२ बस्ने दीपेन्द्र कामतले खुकुरी प्रहार गरेको जिल्ला प्रहरी कार्यालय मोरङका प्रवक्ता डीएसपी रन्जन कुमार दाहालले जानकारी दिए ।

ट्राफिक चोक नजिकै खुकुरी प्रहार हुँदा रायको हातमा चोट लागेको प्रहरीले जनाएको छ । घाइते रायलाई उपचार गर्न विराट नर्सिङ होममा भर्ना गरिएको छ ।

राय जोगबनीमा किराना पसल सञ्चालन गर्छन् । खुकुरी प्रहार गर्ने कामतलाई प्रहरीले नियन्त्रणमा लिएर अनुसन्धान अघि बढाएको छ ।

खुकुरी प्रहारको कारणबारे कामतसँग जानकारी लिने काम भइरहेको डीएसपी दाहालले बताए ।