नेकपा एमालेका सचिव तथा पूर्वमन्त्री टोपबहादुर रायमाझीलाई आइतबार राती मात्रै पक्राउ गरेको छ । नेपाली नागरिकलाई भुटानी शरणार्थी बनाएर अमेरिका पठाउने ठगी प्रकरणमा मुछिएपछि पक्राउ पुर्जी जारी भएलगत्तै एमाले सचिव रायमाझी फरार थिए ।
प्रहरीले रायमाझीविरुद्ध वैशाख २० गते पक्राउ पुर्जी जारी गरेको थियो । पक्राउ पुर्जी जारी हुँदा उनी गृहजिल्ला अर्घाखाँचीको एक कार्यक्रममा सहभागी थिए । तर, प्रहरीको आँखा छल्दै सभामुख देवराज घिमिरेसँगै भैरहवासम्म आएका उनी फरार थिए ।
यस प्रकरणमा संलग्नता देखिएपछि प्रहरीले रायमाझीका छोरा सन्दीप रायमाझीलाई भने वैशाख २० गते नै पक्राउ गरेको थियो । यसबीच टोपबहादुरको खोजीका लागि प्रहरीको एउटा टोली भारत पुगेको थियो । प्रहरीका अनुसार रायमाझी भारतमा रहेको आशंका गरिएको थियो ।
कतिपयले भने उनी काठमाडौंमै रहेको बताउँदै आएका थिए । रायमाझीको खोजीका लागि केन्द्रीय अनुसन्धान ब्यूरोको टोली भारत पुगेको थियो । पक्राउ पुर्जी (वारेन्ट) जारी भएको ११ दिनपछि एमाले सचिव टोपबहादुर रायमाझी पक्राउ परे । प्रहरीलाई छल्दै सम्पर्कविहीन भएका उनी आइतबार काठमाडौंको बूढानीलकण्ठस्थित पासीकोटबाट पक्राउ परेका हुन् ।
प्रतिनिधिसभा सदस्यसमेत रहेका रायमाझी आइतबार साँझ पक्राउ परेको जिल्ला प्रहरी परिसर काठमाडौँका प्रमुख तथा प्रहरी वरिष्ठ उपरीक्षक दानबहादुर कार्कीले जानकारी दिए । उनलाई त्यहाँबाट पक्राउ गरेर परिसरमा ल्याइएको छ । सोही प्रकरणमा अनुसन्धानका लागि प्रहरीले रायमाझीका छोरा सन्दीपलाई भने यही वैशाख २० गते नै पक्राउ गरेको थियो ।
बाबुछोराविरुद्ध एकैदिन पक्राउ पुर्जी जारी भएको थियो । यस्तै, शरणार्थी ठगी प्रकरणमा थप दुई जनाविरुद्ध पक्राउ पुर्जी जारी भएको छ । जिल्ला अदालत काठमाडौंले आइतबार थप दुईविरुद्ध पक्राउ पुर्जी जारी गरेको हो ।
नेपाली कांग्रेसका पूर्वसांसद आङ्टावा शेर्पा र नेकपा एमालेका उपाध्यक्ष तथा पूर्वगृहमन्त्री रामबहादुर थापा बादलका छोरा प्रतिक थापालाई पक्राउ अनुमति जारी गरिएको हो । अहिलेसम्म पूर्वगृहमन्त्री तथा नेपाली कांग्रेसका नेता बालकृष्ण खाँण, सचिव टेकनारायण पाण्डेलगायत १३ जना पक्राउ परिसकेका छन् ।
पक्राउ परेकाले दिएको बयानका आधारमा थप दुई जनाविरुद्ध पक्राउ पुर्जी जारी गरिएको हो । पक्राउ पुर्जी जारी भएका कांग्रेसका पूर्वसांसद आङ्टावा शेर्पाले सानु भण्डारीलाई भेट गरेपछि खाँणसँग मिलेमतो गरेको आशंका गरिएको छ ।
नक्कली शरणार्थी प्रकरणमा ठगी गरेको आरोपमा पक्राउ पुर्जी जारी भएका तीन जना प्रहरीको सूचीमा फरार छन् । जिल्ला अदालत काठमाडौंबाट तत्कालीन गृहमन्त्री रामबहादुर थापा ‘बादल’का छोरा प्रतिक, पूर्वसांसद आङ्टावा शेर्पा, तत्कालीन गृहमन्त्री बादलका सुरक्षा सल्लाहकार इन्द्रजित राईका छोरा निरजविरुद्ध पक्राउ पुर्जी जारी गरेको छ । तर, तीनै जना अहिले प्रहरीको फरार सूचीमा रहेका छन् ।
शरणार्थी ठगी प्रकरणमा अहिलेसम्म प्रहरीले पूर्वगृहमन्त्री खाँण, पूर्वमन्त्री रायमाझी, सचिव टेकनारायण पाण्डे लगायत १३ जनालाई पक्राउ गरिसकेको छ ।
पक्राउ हुनेहरुमा पूर्व गृहमन्त्री बादलका तत्कालीन सुरक्षा सल्लाहकार ईन्द्रजित राई, सानु भण्डारी, केवश दुलाल, रामशरण केसी, गोविन्द चौधरी, टंक गुरुङ, सन्देश शर्मा पोखरेल र सागर थुलुङ पनि पक्राउ परिसकेका छन् ।
पक्राउ परेका १३ जनालाई थप चार दिन हिरातमा राखेर अनुसन्धान गर्न जिल्ला अदालत काठमाडौंले अनुमति दिएको छ । जिल्ला प्रहरी परिसर काठमाडौंको माग बमोजिम पूर्वगृहमन्त्री तथा कांग्रेस नेता खाँणसहित १३ जनालाई थप चार दिन हिरासतमा राखेर अनुसन्धान गर्न आइतबार अदालतले अनुमति दिएको हो ।
साथै, उनीहरुलाई जिल्ला सरकारी वकिल कार्यालय काठमाडौंले अहिलेसम्म प्राप्त प्रमाणका आधारमा मुलुकी अपराध संहिता, २०७४ बमोजिम ठगी तथा संगठित अपराधसम्बन्धी कसुरमा अभियोग लगाउने तयारी गरेको छ ।
जिल्ला वकिल कार्यालय सहन्यायाधिवक्ता अच्यूतमणी नेउपानेले भने अहिलेसम्म ऐनको कुन दफाबमोजिमको कसुरमा अभियोग लगाउने भन्ने यकिन भइसकेको बताए । अबको केही दिनमा प्रहरीले प्रतिवेदन बुझाउनेछ । सरकारी वकिलको कार्यालयले भने १० दिनभित्र अभियोग अदालतमा दर्ता गर्नेछ ।
पछिल्लो पटक पक्राउ पुर्जी जारी भएका बादलका छोरा प्रतिक र पूर्वसांसद आङ्टावा पनि यो ठगी प्रकरणमा संलग्न रहेको प्रहरीले प्रमाण भेटेको दाबी गरेको छ । प्रतिकले भने यसअघि विज्ञप्ति निकालेर उक्त घटनामा आफ्नो कुनैपनि संलग्ना नरहेको भन्दै आपत्ति जनाएका थिए ।
कांग्रेस नेता आङ्टावाले यस प्रकरणमा थुनामा रहेका केशव दुलाल र सानु भण्डारीसँग हिरासतमा पुगेर भेट गरेका थिए । प्रहरीका अनुसार हिरासतमा गएर शेर्पाले कांग्रेस नेता बालकृष्ण खाँणले आरोपीहरुसँग लिएको रकम फिर्ता गर्ने आश्वासन दिएका थिए ।
पछिल्लो समय नेपालमा भ्रष्टाचार मौलाएको भन्दै नागरिकस्तरमा यसको चर्को विरोध भइरहेको छ । अहिले भ्रष्टाचारमा मुछिएका जो कोही पनि छुट्न नहुने भन्दै निष्पक्ष छानविन गर्नुपर्ने माग बढ्दो छ ।
सत्यपाटी संवाददाता । काठमाडौं