नेपाल प्रहरी अस्पतालमा चार करोड कमिसनको सेटिङ धरापमा परेको छ । महंगोमा एमआरआई खरिद गरी ठूलो रकम कमिसन खाने योजनामा अख्तियार दुरुपयोग अनुसन्धान आयोगले धक्का दिएको छ । आयोगले हालै पत्र लेखेर ठेक्का सम्बन्धी सबै कागजात मागेको छ ।
अख्तियारको प्रारम्भिक छानबिनमै बदनियत देखिएपछि ठेक्का रद्द हुने सम्भावना देखिएको छ । प्रहरी अस्पतालले करिब २८ करोड लागतमा एमआरई खरिद प्रक्रिया अघि बढाएको थियो । भएको एमआरआई मर्मत नगरी नयाँ खरिद गर्न लागिएकोमै प्रश्न उठेको थियो । कमिसनकै लागि एमआरआई खरिद गर्न लागिएको अहिले पुष्टि भएको छ ।
चिनियाँ कम्पनी सिमेन्सलाई मिल्ने गरी स्पेशिफिकेसन बनाएर टेन्डर प्रक्रिया अघि बढाइएको थियो । त्यसका लागि सिमेन्सका नेपाल प्रतिनिधि इष्ट वेष्ट कन्सर्नका सञ्चालक शेरसिंह श्रेष्ठले सेटिङ मिलाएका थिए । त्यसमा अस्पताल प्रमुख एआइजी डा.आशा सिंह विवादमा मुछिएकी थिइन् ।
अख्तियारले पत्र लेखेपछि उनको सेटिङ भत्कने सम्भावना बढेको छ । तर, अख्तियारलाई पनि मिलाउने भन्दै व्यापारी श्रेष्ठ दौडधुपमा लागेका छन् । अस्पतालमा सी–आर्म खरिदमा भने अनियमितता पुष्टि हुँदा पनि छानबिन भएको छैन । एफपिडी प्रविधिको ‘सी–आर्म’ आइसकेकोमा अस्पताल प्रशासनले सिसिडी प्रविधिको सि–आर्म उच्च मुल्यमा खरिद गरेको छ ।
जिई कम्पनीबाट उत्पादित सि–आर्मलाई मिल्ने गरी ‘लक स्पेशिफिकेन’ बनाएर खरिदमा अनियमितता भएको हो । स्पेशिफिकेसनका बुँदामा सो कम्पनीलाई मात्र मिल्ने सर्त राखिएको प्रष्ट हुँदा पनि छानबिन हुन सकेको छैन । एआइजी सिंहका साथै प्रहरी अस्पतालका इन्सपेक्टर सुरेन्द्र केसीले खरिदमा लामो समयदेखि अनियमितता गर्दै आएका छन् ।
इन्सपेक्टर केसी रक्षामन्त्री पूर्णबहादुर खड्काका भान्जा हुन् । खड्काकै आडमा उनी सधैं आकर्षक प्रहरी कार्यालयमा बसेर अुकत सम्पत्ति आर्जन गरिसकेका छन् । सोही कारण उनले हाकिमहरुलाई समेत टेर्ने गरेका छैनन् । प्रहरी अस्पतालमा पनि हरेक जसो ठेक्कामा उनको सेटिङ चल्ने गरेको स्रोत बताउँछ ।
जिल्ला प्रहरी परिसर काठमाडौंका एसएसपी दानबहादुर कार्कीको कुर्सी धरापमा परेको छ । कार्यक्षमता कमजोर देखिएपछि उनलाई परिसरको जिम्मेवारीबाट हटाउनेबारे छलफल भइरहेको स्रोत बताउँछ । पछिल्ला केही घटनामा उनको कमान्ड कमजोर देखिएको छ ।
दुई महिनाअघि बालाजु बसपार्कमा भएको आगजनी र लुटपाट घटनामा बालाजु र सोह्रखुट्टे वृत्तका डिएसपीलाई मात्र कारबाही भएको थियो । त्यसमा एसएसपीको गम्भीर कमजोरी देखिएको थियो । बालाजु चोकमा बसेर उनी बसपार्क जाने आँटै नगर्दा ठूलो क्षती भएको थियो । सशस्त्र प्रहरी अघि बढेपछि मात्र उनी पछि लागेका थिए ।
यद्यपि, त्यो घटनामा उनीमाथि कारबाही हुन सकेन । त्यस्तै, गत साता मिटर ब्याजपीडितमाथि बल प्रयोग गरेको घटनाले पनि प्रहरी मात्र होइन सरकार नै बदनाम हुन पुगेको छ । गृहमन्त्रीले सो विषयमा फिल्डका प्रहरी अधिकृतले गलत रिपोर्टिङ गरेको सार्वजनिक रुपमै बताइसकेका छन् । यस विषयमा पनि छानबिन समिति बनाइएको छ ।
त्यस्तै, कतिपय अपराधका घटनामा पनि परिसरको काम कमजोर देखिएको छ । कपनकी निरा आचार्य हत्याको घटनामा सिआइबी र अपराध अनुसन्धान कार्यालयले अनुसन्धान गर्दा परिसरका कोही अधिकृत देखिएनन् । परिसरका अधिकारीहरु मिटरब्याजीको पैसा उठाउनेमै व्यस्त छन् ।
सोही कारण गृहमन्त्रालयले काठमाडौंका एसएसपी हटाउने तयारीमा लागेको स्रोत बताउँछ । भुटानी शरणार्थीका नाममा भएको ठगी घटनाको अनुसन्धान नटुंगाएसम्म उनलाई त्यही राख्न लागिएको छ । त्यस्तै, दरबारमार्ग, सोह्रखुट्टे र जनसेवाका डिएसपीको कमान्ड पनि निकै कमजोर देखिएको छ ।
दरबारमार्गमा कोपिला चुँडाल, सोह्रखुट्टेमा गणेश बम तथा जनसेवामा भेषराज रिजाल छन् । उनीहरु तिनै जना क्षमता भन्दा पनि शक्तिकेन्द्रको आशिवार्दनमा त्यहाँ खटिएका हुन् । दरबारमार्ग प्रहरीको अवस्था कस्तो छ भने गत महिना स्ववियु चुनावको बेला त्रिचन्द्र क्याम्पसका ३–४ जना बिद्यार्थीले घन्टाघरदेखि वृत्तसम्म प्रहरीलाई लखेटेका थिए । काठमाडौंको पुलिसिङमा यस्तो लज्जास्पद घटना कहिल्यै नभएको प्रहरी अधिकारी बताउँछन् ।
भानु देउवाको आफन्त भएकै आधारमा सोह्रखुट्टे पाएका बम यसअघि बालाजु घटनामा कारबाहीमा परिसकेका छन् । रात्रीकालिन व्यवसायीलाई उनले रेट नै राखेर पैसा असुल्ने गरेको उजुरी पर्दा पनि कारबाही हुन सकेको छैन । दरबारमार्ग र सोह्रखुट्टेका डिएसपीको सरुवाको तयारी भइरहेको छ । साथै दुई महिनाअघि जनसेवा पुगेका रिजालको पनि पुलिसिङ कमजोर भएको रिपोर्ट प्रहरी प्रधान कार्यालय पुगेको छ ।
सत्यपाटी संवाददाता । काठमाडौं