सुत्केरी बेथाले च्यापेपछि जाजरकोटको छेडागाढ नगरपालिका–१३ स्थायी ठेगाना भए पनि हाल भेरी नगरपालिका–३ मा बस्दै आएकी ३० वर्षिया भूमिका रोकायाले अस्पताल नपुगी बाटोमै बच्चा जन्माएकी छिन् ।

व्यथाले च्यापेपछि अस्पताल आउँदै गर्दा ती महिलाले जाजरकोटको भेरी नगरपालिका–३ थाप्ले (भेटनरी टोल) नजिकै बाटोमै छोरीलाई जन्म दिएकी हुन् ।

भेरी नगरपालिकाको स्वास्थ्य शाखामा कार्यरत जनस्वास्थ्य निरीक्षक (अधिकृत छैटौँ) दिपक ओली तल भिर नजिकै मान्छे कराइरहेको सुनेपछि के भयो भनेर त्यहाँ पुगे ।

अफ्ठयारो ठाउँमा महिला प्रसव पिडाले कराइरहेको देखेपछि उनले नजिकैबाट आवश्यक स्वास्थ्य सामाग्रीहरू लिन पुगे । उनी बस्ने ठाउँ पनि नजिकै भएकाले सामाग्री लिन सहज भयो ।

बच्चा जन्मिनको लागि अन्तिम अवस्थामा रहेकाले अस्पताल लैजान समेत कठिन हुने भएकाले आफूले त्यही बाटोमै उपचार गर्नुपरेको जनस्वास्थ्य निरीक्षक ओलीले बताए । त्यसपश्चात् नजिकैबाट स्ट्रेचर मगाएर अस्पताल पठाएको स्वास्थ्यकर्मी ओलीले सुनाए ।

‘अस्पताल लैजाने अवस्था थिएन । स्वास्थ्यकर्मी ओलीले भने, ‘मैले आवश्यक सामाग्री लिएर बाटोमै उपचार गरे । साल फुटेकाले बच्चा जन्मिएपछि तुरुन्त अस्पताल पठाइयो ।’ उनी जाजरकोटको जिल्ला अस्पतालबाट २० मिटरको दुरीमै सुत्केरी भएकी हुन् ।

घरमा कोही नभएका कारण अस्पतालमा सुत्केरी हुन ती महिला भिरको बाटो आइरहेको स्थानीयहरु बताउँछन् । मान्छे कराइरहेको जस्तो सुनेपछि त्यही पुगेको ओलीले बताए । बच्चा जन्माइसकेपछि उनीलाई जिल्ला अस्पताल जाजरकोटमा लगिएको छ ।