अनेक प्रश्नहरु छन् मानिससँग
युगौंदेखि जमठ भएर बसेका
आदिम प्रश्न

जीवनका रिपुहरुसँग
युद्धरत प्रश्न
ओठ ओठमा झुन्डिएका
हिजोका निरुपाय सवाल
आज तिखोसँग उभिएका छन्

मानिस अप्रश्नेय भयो भने
कुंजो र जोखिमपूर्ण हविगतमा पर्छ
जीवनको लय

पुरातन प्रश्नहरुको अगाडि
थुपारिएको छ
एक डुङ्गुर फोहोर जवाफको रास
गर्भैदेखि लिएर आएको
जाली लिखतनामाका वकवास
अथवा उस जुनीको फल
करार गरिएको
भ्रामक गरुड पुराण

तिमिसँग पुरातन फतुरको
जाली तमसुक होला
हामीसंग जीवनको मानक गुरुत्व छ
अनि म एकात्मा/अनेकात्मा
मसँग सिङ्गो संसार छ
मेरा प्रश्नमा सामेल मोर्चाहरुमा
ऐकवद्धताका हजारौं लस्करहरु छन्

तिम्रा प्रश्नहरु स्वयममा
विघटित समयका धुर्त मनोसम्वाद हुन्
मेरा प्रश्नहरुको सम्पूर्ण हिस्सामा
समस्त सिर्जनाको घरषण
र तिम्रो खुनी वाचाल तर्कहरुको
प्रतिरोधका पङ्तिवध्द लामहरु छन्

तिम्रो प्रश्नमा कुँदिएका
तिलस्मी अक्षरहरुका लागि
जोखिमपूर्ण छन्
मेरा प्रश्नहरुको यक्षस्तम्भ
मेरो विचारको आविस्कारसँगै
मसंग ज्वलन्त प्रश्नहरु खडा छन्
र तिमिले बन्द गरेको हरेकद्वारमा
जीवनका अर्थपूर्ण आक्रोशको पङ्ति छ
र सत्ता विघटनको संकटमा
जलिरहेछन तिम्रा वाचिक घोषणाहरु

मेरा प्रश्नहरुको समुल सौन्दर्यमा
जगतको सत्य मुस्कान छ
तिम्रा प्रश्नहरुको धुर्त तर्कशास्त्रमा
फरेवको पुलिन्दा मक्किएको छ
कदापि मेल खाँदैन
मेरो भाष्यको दस्तावेज

अनेक प्रश्नहरु छन्
मानिसहरुका विचमा युद्धरत
युगौंदेखि जमठ भएर बसेको
आदिम प्रश्न
आदिम उत्तर