रेस्टुरेन्टमा काम गर्ने एक व्यक्ति अचानक करोडपति बने । उनले २१ करोड रुपैयाँभन्दा बढी कमाए । तर यति धेरै पैसा पाए पनि उनले जागिर छोडेनन् । उनले आफ्ना सहकर्मीलाई धेरै मिस गर्ने भएकाले जागिर छाड्न नसकेको बताए ।

द सनका अनुसार, बेलायतको कार्डिफ निवासी ल्यूक पिटार्ड म्याकडोनाल्डको रेस्टुरेन्टमा काम गर्थे । यस क्रममा उनले १३ लाख पाउण्डको चिठ्ठा जिते । राष्ट्रिय लोटरी ड्रको विजेता बनेपछि उनको भाग्य उज्यालो भयो । तर उनले वेटरको काम छोडेनन् ।

सन् २००६ मा भएको यो घटनालाई स्मरण गर्दै ल्यूकले हालै भनेका छन् कि त्यतिबेला उनकी प्रेमिका एम्मा कक्स पनि त्यहाँ काम गरिरहेकी थिइन् । लटरी जितेपछि उनले एम्मासँग विवाह गरे । त्यसपछि सम्पत्ति किन्न ४ करोड रुपैयाँ खर्च भयो ।

ल्यूक र एम्मा विदेश यात्रा गर्न पनि गए । केही पूँजी लगानी गरे र एक वर्षपछि फेरि जागिरमा फर्किए । उनलाई काममा फर्केको देखेर उनका सहकर्मीहरू छक्क परे । किनकी ल्यूक करोडपति बनेपछि वेटरको काममा फर्कनेछन् भन्ने उनीहरूलाई थाहा थिएन ।

यद्यपि, दम्पतीले जीवनमा पैसाभन्दा पनि धेरै कुराहरू छन् भन्ने विश्वास गर्छन् । ल्यूक भन्छन्, ‘मलाई करोडपति बन्नुअघि म्याकडोनाल्डमा काम गर्न मन पर्थ्यो । पैसा पाएर पनि त्यहाँ काम गर्न रमाइलो लाग्छ । हाम्रो बिहेमा साथीहरू आए । म सधैँ उनीहरूसँग सम्पर्कमा थिएँ । म पनि उनीहरूलाई मिस गर्थे । त्यसोभए किन जागिरमा फर्किनु हुँदैन ?’

एम्माले पनि आफ्नो पुरानो जागिरमा फर्कने आफ्नो पतिको निर्णयलाई समर्थन गरिन् । एम्माले भनिन्, ‘हामी दुबैले म्याकडोनाल्डमा काम गर्न रमाइलो गर्यौं र अझै पनि त्यहाँ असल साथी हौं ।’ म्याकडोनाल्डको अफिस प्रबन्धकले पनि ल्यूकलाई काममा फर्केको देखेर खुशी व्यक्त गरे ।