स्थानीय सरकारले जग्गा उपलब्ध नगराउँदा नेपालगन्जमा लुम्बिनी प्रदेशस्तरीय क्षयरोग उपचार तथा प्रेषण व्यवस्थापन केन्द्रको भवन निर्माण योजना अलपत्र परेको छ ।
राष्ट्रिय योजना आयोगले २०७७ माघ १३ गते नै नेपालगन्जमा लुम्बिनी प्रदेशस्तरीय क्षयरोग उपचार तथा प्रेषण व्यवस्थापन केन्द्रको भवन निर्माण र जग्गा प्राप्तिको प्रक्रियालाई राष्ट्रिय प्राथमिकता प्राप्त आयोजनाका रूपमा स्वीकृति दिएको थियो ।
तर आयोजना स्वीकृत भएको तीन वर्ष बिते पनि स्थानीय सरकारले जग्गा प्राप्त गर्न नसक्दा अस्पताल निर्माणको काम अगाडि बढ्न सकेको छैन । नेपालगन्ज क्षयरोग रेफरल सेन्टरका व्यवस्थापक हिक्मतबहादुर खड्काले निर्माण प्रयोजनका लागि जग्गा प्राप्त नहुँदा भवन निर्माणका लागि छुट्याइएको बजेट तीन पटक फिर्ता भएको बताए ।
यस वर्ष पनि स्वास्थ्य मन्त्रालयले १३ करोड ९९ लाख रुपैयाँ बजेट विनियोजन गरेको छ । जग्गा नै उपलब्ध नभएको अवस्थामा पठाइएको रकमले भवन कहाँ र कसरी निर्माण गर्ने भन्ने कुनै टुङ्गो छैन । यसवर्ष राप्तीसोनारी गाउँपालिकाको महादेवपुरीमा अस्पताल निर्माणका लागि जग्गा प्राप्ती गर्ने प्रक्रियामा रहेको बताइएको छ ।
जिल्ला प्रशासन, भूमिसुधार तथा मालपोत कार्यालय बाँकेले चैत ९ मा सरकारी सार्वजनिक जग्गा दर्ता उपयोग तथा भाडामा प्रयोग गर्ने कार्यविधि सम्बन्धी बैठकद्वारा जग्गा प्राप्त गर्न एक समिति गठन गरेको छ ।
महादेवपुरीको सि.नं. ०३५–१०० कित्ता नम्बर ३ क्षेत्रफल १०८३६ दशमलव २० वर्गमिटर र त्यहीको सि.नं. ३५–११०१ कित्ता नम्बर ४ को २७०९ दशमलव ५ वर्ग मिटर जग्गाको वन क्षेत्रमा स्थलगत अवस्था बुझी प्रतिवेदन पेस गर्न प्रमुख जिल्ला अधिकारीको नेतृत्वमा एउटा उपसमिति गठन गरेको हो ।
त्यो उपसमितिले दिएको प्रतिवेदनलाई हेरेर मन्त्रालयलाई जानकारी पठाउने बाँकेका प्रमुख जिल्ला अधिकारी विपिन आचार्यले बताए । अस्पतालका लागि २०५२ सालदेखि नै जग्गा खोजी सुरु भएको थियो । सरकारले टीबी नेपालसँग सहकार्य गर्दै २०५२ सालदेखि नेपालगन्जमा भाडाको घरमा अस्पताल सञ्चालन गर्दै आएको छ ।
जुन अस्पतालमा वार्षिक ३५ हजारभन्दा बढी मानिस क्षयरोगको परीक्षण गर्न आउँछन् । सरकारले बाँकेमा क्षयरोगका बिरामीका लागि २५ शैय्याको अस्पताल सञ्चालन गरेको थियो । नेपालगन्जमा हाल सञ्चालनमा रहेको अस्पतालमा टीबी परीक्षणका लागि चाहिने सबै उपकरण उपलब्ध छन्, तर उपकरण राख्ने कोठा छैनन् ।
बिरामीका कुरुवा बस्ने ठाउँ छैन । शौचालय र पार्किङ व्यवस्थित छैन । अस्पताल सञ्चालनका लागि चाहिने कुनै पनि मापदण्ड पूरा भएका छैनन् । जीर्ण भवनका कोठाहरू अति साँघुरा भएकाले २०–३० जना बिरामीभन्दा बढी राख्न सक्ने अवस्था नरहेको अस्पतालले जनाएको छ ।
सत्यपाटी संवाददाता । बाँके