कप्तान लियोनल मेसीले १०० गोलको कोसेढुंगा पार गरेको खेलमा अर्जेन्टिनाले बुधबार बिहान अन्तर्राष्ट्रिय मैत्रीपूर्ण खेलमा कुरासाओविरुद्ध ७–० को फराकिलो विजय हासिल गरेको छ ।

मेसीले २०औँ मिनेटमा गरेको गोलबाट अर्जेन्टिनाले अग्रता लिएको थियो । जुन मेसीको १०० औँ गोल थियो । उनले जियोभानी लो सेल्सोको पासलाई नियन्त्रणमा लिँदै विपक्षी रक्षकलाई कटाएर हानेको प्रहार कुरासाओका गोलकिपर इलोए रुमले ठम्याउन सकेनन् ।

त्यसको तीन मिनेट वित्न नपाउँदै निकोलस गोन्जालेजले अर्जेन्टिनाको अग्रता दोब्बर बनाए । ३३औँ मिनेटमा व्यक्तिगत दोस्रो गोल गरेका मेसीले ३७औँ मिनेटमा ह्याट्रिक पूरा गरेका थिए ।

यससँगै मेसीको अन्तर्राष्ट्रिय गोलसंख्या १०२ पुगेको छ । अन्तर्राष्ट्रिय फुटबलमा धेरै गोल गर्ने खेलाडीको सूचीमा मेसीभन्दा अगाडि इरानका अली दाई र पोर्चुगलका क्रिष्टियानो रोनाल्डो छन् । अली दाईले १०९ र रोनाल्डोले १२२ गोल गरेका छन् ।