यदि कोही प्रेम सम्बन्धमा छ र ब्रेकअप भएको छ भने, निराश हुनु आवश्यक छैन । किनकी न्युजिल्यान्डको सरकार अहिले त्यस्ता युवा युवतीहरुको साथमा उभिएको छ । १६ देखि २४ वर्षका युवालाई ब्रेकअपको पीडाबाट बाहिर निकालेर डिप्रेसनमा जान नदिनका लागि सुरु गरिएको अभियानलाई सरकारले समर्थन गरेको छ ।

यसका लागि ठूलो बजेट विनियोजन गर्ने निर्णय पनि भएको छ । वास्तवमा, धेरै अवस्थामा ब्रेकअप पछि यसको गम्भीर परिणामहरू देखा पर्छन्। युवा पुरुष र महिला गलत कदम चाल्छन्। यस्तो अवस्थामा न्यूजिल्याण्डमा ‘लभ बेटर क्याम्पेन’ सुरु भएको छ । यसमार्फत ब्रेकअपका कारण युवालाई डिप्रेसनमा जानबाट रोक्ने प्रयास गरिनेछ ।

सीएनएनको एक रिपोर्टका अनुसार यो अभियान न्यूजिल्याण्डमा महिला मन्त्री प्रियंका राधाकृष्णनको सहयोगमा ठूलो मात्रामा सुरु भएको हो । उनको सामाजिक विकास तथा रोजगार मन्त्रालयले यो अभियानका लागि ५० करोडभन्दा बढी (६.४ मिलियन न्युजिल्याण्ड डलर)को बजेट पनि सार्वजनिक गरेको छ ।

राधाकृष्णनले एक विज्ञप्तिमा भनेकी छिन्, ‘एक हजार २०० भन्दा बढी युवाले हामीलाई ब्रेकअपको प्रारम्भिक अनुभवसँग जुध्न सहयोग आवश्यक भएको बताए । युवाहरूले ब्रेकअपलाई साझा चुनौतीको रूपमा पहिचान गरेका छन् ।’ यस अभियान अन्तर्गत युवा पुस्तालाई ब्रेकअपपछि उत्पन्न हुने परिस्थितिको सामना गर्न र डिप्रेसनमा नपर्न तालिम दिइएको छ ।

यसका साथै युवालाई कुनै पनि प्रकारको घरेलु हिंसामा नपरोस् भन्नका लागि जिम्मेवार परिवारको सदस्य बन्ने तालिम पनि दिइँदै आएको छ । मेसेज, कल वा इमेलमार्फत युवा पुरुष वा महिला यो अभियानमा सामेल हुन सक्छन् । सन् २०२२ मा आएको अनुसन्धान प्रतिवेदनपछि यो अभियान सञ्चालन गर्ने निर्णय भएको हो ।

यस रिपोर्टमा भनिएको छ कि १६ देखि २४ वर्ष उमेरका न्यूजिल्याण्डका लगभग ८७% युवाको ब्रेकअप भएको थियो र त्यसपछि अधिकांशले डिप्रेसनमा आएर गलत कदम चाल्ने प्रयास गरेका थिए । त्यसपछि युथलाइन संस्थाले ‘लभ बेटर क्याम्पेन’ सुरु गरेको हो ।