नेपाल प्रहरीमा भावी नेतृत्व चयन प्रक्रिया अन्योलमा परेको छ । हालका प्रहरी महानिरीक्षक लगायत उच्च अधिकारीले अवकाश पाउन करिब दुई साता मात्र बाँकी रहँदा पनि एआइजी बढुवाकै प्रक्रिया सुरु हुन सकेको छैन ।

एआइजीका पाँच दरबन्दी रिक्त रहे पनि सरकारले बढुवामा ढिलाई हुँदा भावी नेतृत्व चयन प्रभावित बनेको हो । स्रोतका अनुसार गृह मन्त्रालय समेत सम्हालिरहेका प्रधानमन्त्री पुष्पकमल दाहाललाई एआइजी बढुवामा सकस परेको छ ।

यसअघि उनले अशोक सिंहलाई पहिलो नम्बरमा बढुवा गर्न खोजेका थिए । तर, उनले जन्ममिति ढाटेर जागिर खाएको खुलेपछि राजीनामाको बाटो रोजिसकेका छन् । बाँकीमध्येमा कसलाई बढुवा गर्ने भन्ने तय हुन सकेको छैन ।

वरियतामा बसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली, किरण बज्राचार्य, सन्दीप भण्डारी, सुदीप गिरी, मिरा चौधरी, टेकबहादुर तामाङ, उमेशराज जोशी, भिम ढकाल, राजदत्त जोशी, पोषराज पोखरेल, बुद्धीराज गुरुङ, दुर्गा सिंह र किरण राणा छन् ।

उनीहरुमध्ये अन्य केही पनि जन्ममिति विवादमा परिसकेका छन् । जसअनुसार आइजिपीमा टप पाँच मध्येबाटै छनोट हुने सम्भावना छ । पहिलो नम्बरमा रहेका कुँवर कांग्रेस निकट भनेर चिनिन्छन् । उनलाई आइजिपी धिरजप्रताप सिंहले पनि रुचाएका छन् ।

दोस्रो नम्बरका राई इमान्दार भए पनि राजनीतिक पहुँच कमजोर छ । तेस्रो नम्बरका दीपक थापा प्रधानमन्त्रीका निकटस्थ मानिन्छन् । चौथो नम्बरमा श्यामलाल ज्ञवाली पनि बलिया दाबेदार मानिन्छन् । तर, ज्ञवालीको जन्ममिति विवादमा परेको छ ।

पाँचौँ नम्बरकी किरण बज्राचार्य पनि प्रहरीमा पहिलो महिला आइजिपीका रुपमा इतिहास रच्ने प्रयासमा छन् । तर, कसलाई आइजिपीमा अघि बढाउने भन्नेमा सहमति हुन नसक्दा महिनौँदेखि एआइजीका पद रिक्त हुन पुगेका छन् ।

एमाले सरकारबाट बाहिरिएको तथा कांग्रेस सरकारमा सहभागी नभएकाले माओवादीको एकलौटी जस्तो सरकार छ । यद्यपि, प्रधानमन्त्री प्रचण्ड कांग्रेससँग छलफल गरेरै आइजिपी नियुक्ति गर्ने पक्षमा छन् ।

अघिल्लो पटक आइजिपी नियुक्ति गर्दा प्रचण्ड विवादमा फसेकाले यसपटक विवादमुक्त निर्णय गर्ने प्रयासमा छन् । अहिले आइजिपीका दाबेदारहरु गत असारमा मात्र डिआइजी भएका थिए । डिआइजीमा काम गरेको एक वर्ष पनि अवधि नपुगी उनीहरु आइजिपीको प्रतिस्पर्धामा छन् ।

यस्तो अवस्थामा प्रहरी नेतृत्व कमजोर हुने भएकाले ३० वर्षे सेवाहद हटाएर अहिलेकै आइजिपीलाई निरन्तरता दिने विषयमा पनि छलफल भइरहे पनि एकैपटक सेवाहद हटाउन केही ब्याचलाई ठूलो मर्का पर्न सक्ने भएकाले यो विषयमा निर्णय गर्न पनि सहज छैन ।

त्यसकारण नेपाल प्रहरीमा नेतृत्व चयन प्रक्रिया समयमै नहुँदा विगतमा जस्तै यसपटक पनि विवादमा पर्ने सम्भावना देखिएको छ । ३० वर्षे सेवाहदका कारण आइजिपी सिंहसहित सबै एआइजीले १० चैतदेखि अवकाश पाउनेछन् ।