भारतलाई पराजित गर्दै नेपालले बंगलादेशमा जारी साफ यू–२० महिला च्याम्पियनसीप फुटबलको फाइनलमा प्रवेश गरेको छ । ढाकामा भएको खेलमा भारतलाई ३–१ गोलअन्तरले पराजित गर्दै नेपाल फाइनलमा प्रवेश गरेको हो ।

राउन्ड रोबिनको आधारमा जारी प्रतियोगिताको अन्तिम खेलमा नेपालले भारतलाई पराजित गर्यो । नेपालले ३ मध्ये २ खेलमा जित हात पारेको छ । यसअघि पहिलो खेलमा बंगलादेशसँग ३–१ ले पराजित भएको नेपालले दोस्रो खेलमा भुटानलाई ४–० ले हराएको थियो ।

भारतले भने पहिलो खेलमा भुटानलाई हराएपनि दोस्रो खेलमा बंगलादेशसँग बराबरी खेलेको थियो । भारतविरुद्ध नेपाललाई जित दिलाउन अन्जली चन्द, अमिशा कार्की र कप्तान प्रिति राईले एक–एक गोल गरे । भारतका लागि एकमात्र गोल अपूर्णा नारजेरीले गरेकी थिइन् ।

अपूर्णाले २१ औँ मिनेटमा गोल गर्दै भारतलाई अग्रता दिलाएकी थिइन् । सुमती कुमारीको पासमा अपूर्णाले गोल गरिन् । तर अन्जली चन्दले नेपालका लागि ४८ औँ मिनेटमा बराबरी गोल गरिन् । भारतीय गोलरक्षक अन्सिकाले गरेको गल्तीको फाइदा उठाउँदै अन्जलीले गोल गरेकी थिइन् ।

त्यसैगरी, प्रिति राईले ६९ औँ मिनेटमा पेनाल्टीमार्फत गोल गरिन् । सुनकला राईलाई भारतीय खेलाडीले पेनाल्टी बक्सभित्र फाउल गरेपछि नेपालले पेनाल्टी पाएको थियो । अमिशाले ८९ औँ मिनेटमा नेपालका लागि तेस्रो गोल गरिन् । कप्तान प्रितिले दिएको पासमा अमिशाले गोल गरेकी हुन् ।