ताइवानी सेनाले प्रयोग गर्ने क्षेप्यास्त्रहरु मध्येमा कम्तीमा एउटाको एक उपकरण मर्मतका लागि चीनमा पठाइएको थाहा भएपछि ताइवानमा बृहत राष्ट्रिय सुरक्षाका लागि व्यापक आवाज उठ्न थालेको छ ।

वास्तवमा ताइवानको युद्धपोत क्षेप्यास्त्र भेदक सिउङ–फेङ–३ को प्रक्षेपण कार्यमा प्रयोेग गरिने एउटा अप्टिकल उपकरण मर्मतका लागि युरोपस्थित यसको उत्पादन केन्द्रमा पठाइएको थियो ।

तर, ताइवानी सञ्चारमाध्यमका अनुसार सो उपकरणलाई पूर्वी चीनको सान्डोङ प्रान्तबाट ताइवान फर्काइएको छ । गत वर्ष चीनले टापु राष्ट्र ताइवान वरपर आफ्नो सैनिक गतिविधि तीव्र पारेको थियो ।

चीनले सधैँ नै ताइवानलाई आफ्नै भूभाग भएको दाबी गर्दै आएको छ । साथै, चीनले आवश्यक परेमा सैनिक बल प्रयोग गरेर भए पनि ताइवानलाई एकीकरण गरिने पनि बताउने गरेको छ । तर, स्व–शासित ताइवानले भने आफूलाई सार्वभौमसत्ता सम्पन्न स्वतन्त्र मुलुकको रुपमा हेर्ने गरेको छ ।

यसैगरी, ताइवानी राष्ट्रपति त्साइ इंग–वेनले बेइजिंगबाट हुनसक्ने सम्भावित आक्रमणलाई मध्यनजर राख्दै प्रतिरक्षा स्थितिलाई सुदृढ बनाउन नयाँ योजनाहरु घोषणा गरेकी छन् । यसअन्तर्गत ताइवानी जनतालाई चार महिनाबाट बढाएर एक वर्ष लामो अनिवार्य सैनिक सेवा पनि घोषित गरिएको छ ।

एक विज्ञप्तिमार्फत ताइवानी क्षेप्यास्त्र विकासकर्ता राष्ट्रिय चुङ–सान विज्ञान तथा प्रविधि प्रतिष्ठानले जनाएको छ, ‘ताइवानी सेनालाई क्षेप्यास्त्र उपलब्ध गराउने स्विजरल्यान्डको एउटा कम्पनीलाई त्यो बिग्रेको उपकरण पठाइएको थियो । तर, त्यो उपकरण चिनियाँ सहर क्विंगदाओस्थित कम्पनीको एसिया मर्मत केन्द्रमा मर्मतका लागि पठाइएको रहेछ । तर, युरोप पठाइनुअघि यसको मेमोरी कार्ड झिकिएको थियो । फर्काइएपछि पनि यसको सूचना सुरक्षा परीक्षण गरिएको छ । सूचना चुहावट हुनसक्ने सम्भावनाबारे कुनै चिन्ता छैन ।’

यसैबीच, ताइवानको प्रतिरक्षा सुरक्षा अनुसन्धान प्रतिष्ठानका डा. सु त्जु–युनले अप्टिकल उपकरणहरु क्षेप्यास्त्रका प्रत्यक्ष भाग नभएको तर ताइवान थप सतर्क रहनुपर्ने बताएका छन् ।