अफ्रिकी मुलुक प्रजातान्त्रिक गणतन्त्र कंगोमा भारी वर्षा भएपछि आएको बाढी पहिरोमा १ सय जना भन्दा बढीको मानिसकाे मृत्यु भएको छ ।

कंगोकोे राजधानी किन्सासाका विभिन्न जिल्लाका सयौं घरहरू भत्कनुका साथै डुबानामा परेकाले हजारौं मानिसहरू घरबारबिहीन भएका हुन् । राजधानी किन्सासाको दक्षिणी भेग मोन्ट–नगाफुलाका अधिकांश घरहरू पहिरोले पुरिएका छन् ।

नदीको बाढी बस्तीमा समेत पस्दा त्यहाँका सर्वसाधारणको बिचल्ली भएको छ । कंगोका प्रधानमन्त्री जिन मिशेल सामा लुकोन्डोले घटनाप्रति दु:ख व्यक्त गर्दै उद्धारकार्य तीब्र गतिमा भइरहेको जानकारी दिनुभयो ।

भारी वर्षा अझै जारी रहेको र भग्नावशेषमा पुरिएकाहरूकोे उद्धार कार्य जारी रहेकाले मृतकको संख्या बढ्न सक्ने अनुमान गरिएको छ । किन्सासाको २४ वटा इलाकामा १ करोड २० लाख मानिसको बसोबास रहेको छ ।

त्यहाँका अधिकांश घरहरू डुबानमा पर्नुका साथै सडकहरू समेत भासिएका छन् ।