सुर्खेतका नरेन्द्रबहादुर आइतबार दुबई जाँदैछन् । एक हप्ताअघि वैदेशिक रोजगारीका लागि सुर्खेतबाट काठमााडौँ आएका उनी आइतबार चुनावकै दिन भए पनि भिसा आएका कारण उनी दुबई जान लागेका हुन् ।
दुबई हुँदै उनी रोजगारीका लागि इराक जाने बताउँछन् । केही समयअघि इराकबाटै फर्किएका उनी फेरि रोजगारीका लागि सोही देश जान लागेका हुन् । जबकी सरकारले इराकलाई कालोसूचिमा राखेको छ, कुनै पनि नेपाली वैधानिक रुपमा इराक जान पाउँदैनन् ।
तर उनीजस्ता झण्डै डेढ लाख नेपाली इराकका विभिन्न ठाउँमा काम गरिरहेको उनको भनाई छ । ‘म जस्ता १ लाख ८० हजार मानिसले इराकमा काम गरिरहेका छन्,’ उनले भने, ‘तर नेपालमा हल्ला चलेजस्तो असुरक्षित भन्ने छैन । सबैले राम्रैसँग काम गरिरहेका छन् ।’
२०६० सालमा इराकमा त्यहाँका विद्रोहीको निशानामा परेर १२ जना नेपालीको विभत्स हत्या भएको थियो । त्यसपछि सरकारले इराक जान प्रतिबन्ध लगाएको हो । तर नेपाली आकर्षक तलब र आम्दानी हुने भन्दै इराक जाने गरेका छन् ।
यस्तै काठमाडौँका प्रेम लामा पनि आइतबार नै इराक जाँदैछन् । दुबई हुँदै इराक जाने उनीहरु हप्तादिनदेखि गौशालाको होटलमा बसाईपछि विदेश जान लागेका हुन् । चुनावको दिन भोट हालेर जान सक्ने सम्भावना रहेपनि उनीहरु मतदान नगरी विदेश जान लागेका हुन् ।
आइतबार रातीको उडानबाट विदेश जान लागेका उनीहरुको देशका नेताहरुप्रति आश र भरोसा छैन । यद्यपी केही नयाँ, स्वतन्त्र र विज्ञ युवाहरु पनि चुनावी मैदानमा छन् । जसले यसपटक थोरै भएपनि आश पलाएको उनीहरु बताउँछन् ।
‘यसपटक रवि लामिछाने, सागर ढकाल, रवीन्द्र मिश्र, मिलन पाण्डेजस्ता युवाहरु चुनावी मैदानमा छन्,’ विमानस्थल जाने सुरमा रहेका उनी भन्छन्, ‘यसपटक बुढा नेताहरु बिदा गरेर युवालाई जिताउनुपर्छ । उनीहरुले जितेमा देश बन्छ भन्ने आश छ । त्यसपछि विदेशबाटै फर्केर केही गर्नुपर्ला ।’
यसपटकको चुनावमा पनि हजारौँ नेपाली विदेशिएका छन् । चुनावकै दिन पनि विदेश उड्ने युवाको लस्कर लामै छ । जसलाई रोक्ने कसैको तागत छैन । नयाँ युवा, स्वतन्त्र युवा र देशमै केही गरौँ भन्ने युवाहरु चुनावमा उठेपनि उनीहरुका सुनौला नाराले युवाहरुलाई देशमा रोक्न सकेन ।
झण्डै ७० लाख नेपाली विदेशमा रहेको भनिएपनि त्यो संख्या बढेर अहिले एक करोड पुग्न लागेको छ । तर पनि यो संख्या बढाउनेभन्दा घटाउनेतर्फ कसैको ध्यान छैन । नेपाली नै भएपनि मतदानबाट बञ्चित भएका उनीहरुले यसपटक पनि मतदान गर्न पाएनन् ।
उनीहरुले पठाएको रेमिट्यान्सले देश चलेको भएपनि उनीहरुको अमूल्य मतको कदर हुन सकेको छैन । यो नै नेपालीको विडम्बना हो । हजारौँ नेपाली जुन दिन विदेश जानबाट रोकिन्छन्, त्यो दिन मात्रै देश बन्न सक्छ । तर यसको वास्तविकता बुझ्ने नेपालीको संख्या नै कम छ । किनकी आज पनि आम नेपालीमा विदेश नगई भविष्य बन्दैन भन्ने भ्रम हावी छ ।
सत्यपाटी संवाददाता । काठमाडौं