नेपाली राष्ट्रिय फुटबल टिमले आज बुधबार पाकिस्तानसँग मैत्रीपूर्ण खेल खेल्दैछ ।

त्रिपुरेश्वरस्थित दशरथ रंगशालामा साँझ साढे पाँच बजे खेल सुरू हुनेछ । पाकिस्तानविरुद्धको खेल दशरथ रंगशालामा नेपालको लागि ५० औं खेल हुनेछ ।

पाकिस्तान झण्डै तिन वर्ष लामो फिफाको निलम्बनबाट फुकुवा भएपछि पहिलो अन्तराष्ट्रिय खेल खेल्न नेपाल आएको हो । पाकिस्तानविरुद्धको खेलको लागि नेपाली टोलीको प्रशिक्षण प्रवेश कटुवालले गरिरहेका छन् भने रोहित चन्दले पहिलो पटक नेपालको कप्तानी गर्दैछन् ।

नेपालले पछिल्लो पटक पाकिस्तानसँग सन् २०१८ मा खेलेको थियो । साफ च्याम्पियनसिप अन्तर्गत ढाकामा भएको खेलमा नेपाल २–१ गोलले पराजित भएको थियो ।