रोजगारीका लागि साउदी अरब पुगेका एक नेपालीलाई मृत्युदण्ड दिइएको छ।

विगत १५ वर्षदेखि साउदी अरबको जेलमा रहेका उदयपुरका विवेक दाहाललाई मृत्युदण्डको सजाय दिइएको रियादस्थित नेपाली दूतावासका प्रथम सचिव तथा सूचना अधिकारी ऋषिराज आचार्यले जानकारी दिए।

यहाँको जुवेल जेल प्रशासनले कार्तिक ६ गते दाहाललाई मृत्युदण्डको सजाय कार्यान्वयन गरेको सचिव आचार्यले बताए। दूतावासलाई समेत जानकारी नदिई उनलाई मृत्युदण्डको सजाय दिएको र शव साउदीको जमिनमा गाडिएको सूचना अधिकारी आचार्यले बताए।

दाहालले २ फेब्रुअरी २००७ मा आफन्त राजेन्द्र विष्टको हत्या गरेका थिए। अदालतले विष्टको हत्या गरेको ठहर गर्दै मृत्युदण्डको सजाय सुनाएको थियो। तल्लो अदालतको आदेशलाई, क्रिमिनल कोर्ट र सर्वोच्च अदालतबाट पनि सदर भएको थियो।

२००६ मा साउदी अरब पुगेका उनी, विष्ट र सुडानी नागरिक साउदी मरुभूमिमा ऊँटको हेरचाह गर्ने काम गर्थे। उनले सुतिरहेको बेला विष्ट र सुडानी नागरिक हत्या प्रयास गरेका थिए। विष्टको तत्काल मृत्यु भएको थियो भने सुडानी नागरिकको आँखामा क्षति पुगेको थियो।

पीडित राजेन्द्र विष्टको परिवारलाई दाहालको परिवारले ब्लडमनीबापत रकम दिएको भन्दै सन् २०११ मा नेपाली दूतावासले जुवेलको अदालतमा आममाफी दिन निवेदन दिएको थियो।

विष्टको परिवारबाट माफी भए पनि उपचारपछि स्वदेश फर्किएका सुडानी नागरिक माफी नदिई सर्म्पकविहीन भएपछि उनीलाई मृत्युदण्ड दिइएको हो। उनीमाथि पशु करणीको पनि मुद्दा थियो।

यसअघि नेपाल भ्रमणमा आएका साउदीका विदेशमन्त्री फैजल बिन फरहान बिन साउदसँगको भेटमा परराष्ट्रमन्त्री नारायण खड्काले साउदीमा मृत्युदण्डको सजाय सुनाइएका सन्तबहादुर पुन र विवेक दाहाललाई आममाफी दिएर जीवनरक्षा गरिदिन आग्रह गरेका थिए।

वैदेशिक रोजगारीका लागि साउदी पुगेका सन्तबहादुर पुन अझै त्यहाँ मृत्युदण्ड कुरेर बसिरहेका छन् भने दाहाललाई मृत्युदण्ड दिइएको छ।