मंसिर ४ को निर्वाचन प्रयोजनका लागि स्वतन्त्र र दलका बागी उम्मेदवारी दिएका उम्मेदवारहरूलाई निर्वाचन आयोगले बुधबार चुनाव चिह्न प्रदान गरेको छ ।

पार्टीभन्दा फरक रहेर स्वतन्त्र उम्मेदवारी दिएका उम्मेदवारहरूलाई आयोगले पुतली, लौरो, त्रिभुज, सिरिन्ज, कैंचीलगायत फरक–फरक चुनाव चिह्न प्रदान गरेको छ ।

नेपाली कांग्रेस सभापति एवं प्रधानमन्त्री शेरबहादुर देउवासँग चुनाव लड्न डडेल्धुराबाट मनोनयन दर्ता गराएका स्वतन्त्र उम्मेदवार सागर ढकालले ‘सिरिन्ज’ चुनाव चिह्न पाउनुभएको छ ।

त्यस्तै, एमाले अध्यक्ष केपी शर्मा ओलीको क्षेत्र झापा– ५ बाट प्रतिनिधिसभा सदस्य पदमा स्वतन्त्र उम्मेदवारी दिएका युग पाठकलाई पुतली चुनाव चिह्न परेको छ ।

नेपाली कांग्रेसका नेता रामचचन्द्र पौडेलसँग भिड्न तनहुँ–१ को प्रतिनिधिसभा सदस्यमा स्वतन्त्र उम्मेदवारी दिएका कांग्रेसका पूर्वसहमहामन्त्री गोविन्दराज जोशीले ‘कैंची’ चुनाव चिह्न पाउनुभएको छ ।

जोशीले गत निर्वाचनमा समेत पौडेलको खिलापमा बागी उठेर पौडेललाई हराउन भूमिका खेल्नुभएको थियो ।

यो समाचार आजको नेपाल समाचारपत्र दैनिकमा प्रकाशित छ ।