नेकपा एमालेका अध्यक्ष केपी शर्मा ओलीको गल्तीका कारण राष्ट्रियसभाबाट एमालेले एक सिट गुमाएको छ । रुपन्देही क्षेत्र नम्बर ५ मा उम्मेदवारीका कारण राष्ट्रियसभाबाट एमालेले एक सिट गुमाएको हो ।

राष्ट्रियसभा सदस्य पदबाट राजीनामा दिएर रुपन्देही क्षेत्र नम्बर ५ बाट प्रतिनिधिसभामा उम्मेदवारी दिएका खिमलाल भट्टराईको उम्मेदवारी कायम हुन नसकेपछि राष्ट्रियसभाबाट एमालेले एक सिट गुमाउनु परेको हो ।

सोही क्षेत्रबाट निर्वाचन आयोगले एमालेका अर्का उम्मेदवार बासुदेव घिमिरेलाई पार्टीको आधिकारिक उम्मेदवारको मान्यता दिएपछि नेता भट्टराईले राष्ट्रियसभा सदस्यसँगै प्रतिनिधिसभाको टिकट समेत गुमाएका छन् ।

एमालेले सुरुमा घिमिरेलाई उम्मेदवारको टिकट दिएको थियो । तर, बीचमा अध्यक्ष ओलीले घिमिरेको टिकट रद्द गरेर खिमलाललाई उम्मेदवार बनाउने निर्णय गरेपछि राष्ट्रियसभामा एमालेले एक सिट गुमाएसँगै खिमलाल अलपत्र परेका छन् ।

राष्ट्रियसभामा एमालेका सचेतक खिमलाल भट्टराईको पद त गुम्यो गुम्यो, रुपन्देही ५ मा उम्मेदवार पनि पाउन सकेनन् । रुपन्देहीको क्षेत्र नं. ५ मा अन्ततः नेकपा एमालेबाट वासुदेव घिमिरेको उम्मेदवारी कायम भएपछि भट्टराई अलपत्र परेका हुन् ।

सुरुमा घिमिरेलाई उम्मेदवारको टिकट दिएपछि सोही आधारमा उनले मनोनयन दर्ता गराएका थिए । बीचमा एमाले पोलिटब्युरो सदस्य समेत रहेका खिमलाललाई टिकट दिनुअघि नै घिमिरेले उम्मेदवारी दर्ता गरेपछि निर्वाचन आयोगले घिमिरेलाई नै आधिकारिकता दिएको छ ।

घिमिरेले आइतबार ३ः३० बजे मनोनयन दर्ता गरेका थिए भने भट्राईले ४ः४५ बजे दर्ता गराएका थिए । निर्वाचन निर्देशिका ०७९ को दफा १९ को (९) अनुसार एकै पार्टीका उम्मेदवारले उम्मेदवारी दिए जसले पहिले मनोनयन दर्ता गराएको हो उसैलाई आधिकारिकता दिने व्यवस्था छ ।

राष्ट्रियसभा सदस्यसँगै प्रतिनिधिसभाको टिकट समेत गुमाएपछि प्रतिक्रिया दिँदै नेता भट्टराईले जसले टिकट पाएपछि एमालेले जित्नुपर्ने प्रतिक्रिया दिए । उनले भने, ‘जसले आधिकारिकता पाए पनि, जोसुकै भए पनि एमालेका उम्मेदवारले देशभरि जित्नुपर्छ ।’

एमालेले जित्नुपर्ने बाहेक अरु कुनै प्रतिक्रिया आफूसँग नभएको उनको भनाइ छ । देशभरिका १६५ वटै निर्वाचन क्षेत्रमा एमालेले जित्नुपर्ने उनले बताएका छन् । यद्यपी एमाले अध्यक्ष ओलीले गल्ती नभई खिमलालको राजनीति भविष्यमाथि खेलबाड गरेको भन्दै वृत्तमा चर्को आलोचना भइरहेको छ ।

राष्ट्रियसभा सदस्यबाट राजिनामा दिन लगाएर प्रतिनिधिसभाको टिकट जानाजान अर्कै व्यक्तिलाई दिएको भन्दै अध्यक्ष ओलीको आलोचना भइरहेको छ । अध्यक्ष ओलीले खिमलालको राजनीति भविष्य सिध्याउनकै लागि घिमिरेलाई टिकट दिएर अहिले गल्ती भएको भन्दै ओठे जवाफ दिइरहेको भन्दै एमालेभित्र चर्को आलोचना भइरहेको छ ।