प्रहरीको कमाण्ड फितलो भएपछि इलाका प्रहरी कार्यालय कोहलपुर मातहत रहेको क्षेत्र असुरक्षित भएको छ । पछिल्लो समय कोहलपुर क्षेत्रमा हत्या, चोरी र लुटपाटका घटना वृद्धि भइरहेका छन् ।
प्रहरी निरीक्षक (इन्स्पेक्टर)बाट प्रहरी नायव उपरीक्षक (डिएसपी)मा बढुवा भएलगत्तै इलाका प्रहरी कार्यालय कोहलपुरको कमाण्ड सम्हालेका ऐनबहादुर मल्लले कोहलपुर क्षेत्रको शान्ति सुरक्षालाई चुस्त, व्यवस्थित र सुरक्षित बनाउन नसकेको नागरिकहरु बताउँछन् ।
पहुँच र पावरका भरमा सिनियर डिएसपीलाई उछिनेर इलाका प्रहरी कार्यालय कोहलपुरको कमाण्ड सम्हालेका डिएसपी मल्ल आएदेखि नै कोहलपुर असुरक्षित बन्दै गएको छ । डिएसपी मल्लमाथि कोहलपुर आएलगत्तै असुली धन्दा चलाउने आरोप लाग्ने गरेको छ ।
लागुऔषध कारोवारीसँग सेटिङ्ग नमिलेपछि पक्राउ गर्ने र नत्र असुली धन्दा चलाउने गरेको आरोप डिएसपी मल्लमाथि लाग्दै आएको छ । बुधबार राती कोहलपुरमा हतियारधारी समुह प्रवेश गरी लाखौं लुटपाट हुँदा प्रहरीले सुइँको पाउन सकेन ।
आफ्नो सुरक्षा क्षेत्रमा हतियारधारी समुहले लुटपाट गर्दा पनि प्रहरीले सुइँको नपाउनुमा मल्लकै सेटिङ्ग रहेको स्थानीयको आशंका छ । ‘हामीलाई प्रहरीकै मिलेमतो रहेको शंका छ, नत्र हतियारधारी समुहबारे प्रहरी किन बेखबर भयो ?,’ एक जना स्थानीयले भनेका छन् ।
बन्दुकधारीको एक समूहले बुधबार राती कोहलपुर–८ का एक स्थानीयको घरमा लुटपाट गरेको छ । बुधबार मध्यरातमा उक्त समूहले विरेन्द्रजंग शाहीको घरमा १० तोला सुन र दुई लाख रुपैयाँ रुपैयाँ लुटपाट भएको छ ।
लुटपाटबारे प्रहरीलाई जानकारी गराउन खोज्दा उक्त समूहले मोबाइल पनि लुटेर लगेको पीडितले जनाएका छन् । रातीको समयमा ढोका खोल्न लगाएर लुटेरा समुहले शाहीको घरमा लुटपाट गरी घरमा थुनेर भागेको थियो ।
सुन लुट्ने गिरोह लामो समयदेखि बाँके र बर्दियामा सक्रिय छ । बाँकेको खजुरा, बर्दियाको कालिका, कतर्निया लगायतका बजारमा सुन लुटपाट गरिसकेको छ । उक्त गिरोहले रातीका समयमा ढोका खोल्न लगाएर लुटपाट गर्ने र थुनेर भाग्ने गरेको छ ।
सत्यपाटी । बाँके ।