जुम्लाको सिंजा गाउँपालिकाको शिक्षा तथा खेलकुद शाखाले गाउँपालिकाभित्रका आधारभूत तहका अंग्रेजी विषयगत शिक्षकलाई पाँच दिने पेशागत क्षमता विकास सम्बन्धी पुर्नताजकी तालिम सञ्चालन गरेको छ ।

असोज १ गतेदेखि ५ गतेसम्म सञ्चालन भएको को समापन गर्दै गाउँपालिका अध्यक्ष पूर्णप्रसाद धितालले गाउँपालिकाभित्रका सबै सामुदायिक विद्यालयमा अंग्रेजी शिक्षालाई थप गुणस्तरीय बनाउन शिक्षकलाई पाँच दिने अंग्रेजी पुर्नताजकी तालिमले महत्वपूर्ण भूमिका खेलेको बताए ।

उनले भने, ‘विद्यालयलाई थप प्रभावकारी बनाउका लागि सबै शिक्षकको अति महत्वपूर्ण भूमिका र कर्तव्य रहेको छ । पहिलो पटक यो तालिम सञ्चालन गरेका छौं । आधारभूत तहबाटै अब सबै विद्यालयमा अंग्रेजी माध्यमबाट पढाई हुने भएको छ ।’

विद्यालयमा विद्यार्थीलाई अंग्रेजी विषयको पढाईमा आकर्षण गर्नेका लागि तालिमबाट सिकेको कुरा कार्यान्वयन गर्ने शिक्षकको काँधमा आएको अध्यक्ष धितालले बताए । शिक्षक, कर्मचारीको क्षमता अभिवृद्धि गर्नेका लागी गाउँपालिका सधै लागि परेको पनि उनले बताए ।

आफ्नो कर्तव्य र जिम्मेवारी पुरा गर्ने सबै शिक्षक र कर्मचारी एक आपसमा सहकार्य र समन्वय गरेर अघि बढे सिंजाको विकास र सेवा प्रवाहमा चुस्त हुने अध्यक्ष धितालले जानकारी दिए । तालिममा प्रशिक्षक मणिराम शर्माले सहजीकरण गरेका थिए ।

तालिम अवधिमा सिकाएका कुरा सिंजा गाउँपालिकाको शैक्षिक योजनमा समावेश गरे शिक्षामा थप सुधार हुने प्रशिक्षक शर्माले बताए । तालिका सहभागी शिक्षक शिवनन्द शर्माले अंग्रेजी विषयगत तालिमले थप अध्यापनमा प्रभावकारी भूमिका खेलेको बताए । तालिमबाट सिकेका कुरा व्यवहारमा उत्तार्ने शिक्षक तिर्थप्रसाद अधिकारीले जानकारी दिए ।

शिक्षकका लागि पहिलो पटक तालिम सञ्चालन गरी शैक्षिक गुणस्तर विकासमा गाउँपालिकाले नमुना काम गरेको तालिममा सहभागी शिक्षक भगवती रावलले बताइन् । पालिकाभित्रका २२ वटा आधारभूत तहका अंग्रेजी विषयका शिक्षकहरु तालिममा सहभागी भएको सिंजा गाउँपालिका शिक्षा शाखाले जनाएको छ ।