प्रहरीले १७ वर्षीया नाबालिका बलात्कारको अभियोग लागेका नेपाली राष्ट्रिय क्रिकेट टोलीका निलम्बित कप्तान सन्दीप लामिछानेलाई इन्टरपोलमार्फत पक्राउ गर्ने प्रकृया अगाडि बढाएको छ ।

प्रहरी प्रहरी प्रधान कार्यालयले इन्टरपोलको नेपाल शाखामार्फत हेडक्वाटरलाई ‘नोटिस’मा राख्नको लागि अनुरोध–पत्र पठाएको एक प्रहरी अधिकारीले  बताए ।

भदौ २३ गते उनीविरुद्ध जिल्ला अदालत काठमाडौंबाट बलात्कार अभियोगमा पक्राउ पुर्जी जारी भएको थियो । उनीविरुद्ध १७ वर्षीया एक किशोरीले भदौ ५ गते आफूलाई काठमाडौंको एक होटलमा लगी पटक–पटक बलात्कार गरेको आरोप लगाउँदै प्रहरी वृत गौशालामा उजुरी दिएकी थिइन् । उनले भदौ २१ गते उजुरी दर्ता गराएकी थिइन् ।

सन्दीप भदौ ६ गते बिहान होटलबाट निस्किएर टी–२० क्रिकेट खेल्नका लागि केन्या गएका थिए । उनी केन्याबाटै क्यारेबियन लिग खेल्न वेस्ट इन्डिज गएका थिए । खेल खेल्न नपाउँदै आरोप लागेपछि उनी त्यहाँबाट हिँडेका थिए ।

यता, प्रहरीले पनि उनको खोजी गरिरहेको छ । लामिछाने कहाँ छन् भन्ने विषयमा जानकारी नभएको प्रहरीको दाबी छ ।

के सजिलै इन्टरपोलमार्फत ल्याउन सक्छ प्रहरीले ?

सन्दीप लामिछाने लामो समयसम्म नेपाल नआएर विदेशमै लुकेको खण्डमा इन्टरपोलबाट नेपाल ल्याउनसक्ने अवस्था भने त्यति सहज छैन । कानूनी प्रकृया पुर्‍याएर ल्याउनु पर्ने भएकाले तत्कालै ल्याउने अवस्था नदेखिएको प्रहरी अधिकारीहरू स्वीकार गर्छन् ।