निर्वाचन आयोगले धरान उपमहानगरपालिकाका मेयर हर्क साम्पाङलाई पाँच लाख ५० हजार जरिवाना तोकेको छ । आयोगले काठमाडौं महानगरपालिकाका प्रमुख बालेन्द्र शाहलाई सात लाख ५० हजार रुपैयाँ जरिवाना तोकेको छ ।
निर्वाचन आयोग ऐन दफा २६ को उपदफा १ अनुसार धरान र काठमाडौंका मेयरसहित १ लाख २३ हजार ६२४ उम्मेदवारले निर्धारित समयमै खर्च विवरण नबुझाएको वा ढिलो गरी बुझाएपछि आयोगले जरिवाना तोकेको हो ।
निर्वाचन आयोगले ढिलो गरी निर्वाचन खर्च बुझाएको भन्दै नामसहित जरिवाना रकम तोकेको छ । मतपरिणाम सार्वजनिक भएको ३० दिनभित्र निर्वाचन खर्च विवरण बुझाउनुपर्ने निर्वाचन आयोग ऐनमा व्यवस्था छ ।
खर्च विवरण नबुझाउने र ढिला बुझाउनेलाई आयोगले निर्धारण गरेको निर्वाचन खर्च सीमाको आधार जरिवाना गर्ने निर्णय गरेको हो । निर्वाचन आयोगका अनुसार जरिवाना रकम ६ महिनाभित्र तिरिसक्नु पर्नेछ ।
६ महिनाभित्र जरिवाना नबुझाए पद नै जाने कानुनी व्यवस्था रहेको छ । निर्वाचन आयोगले ऐन अनुसार खर्चको विवरण पेस नगर्ने देशभरका १ लाख २३ हजार ६२४ जनालाई जरिवाना गर्ने निर्णय गरेको हो ।
निर्वाचन आयोग ऐनको दफा २६ को उपदफा १ मा तोकिएको अवधिमा खर्च विवरण पेन नगर्ने राजनीतिक दल वा उम्मेदवारलाई निजले गरेको खर्च वा आयोगले निर्धारण खर्चको हममध्ये जुन बढी हुन्छ सोही बराबरको जरिवाना तर्न सक्ने प्रावधान छ ।
आयोगले तोकेको जरिवाना ६ महिनासम्म नबुझाउने राजनीतिक दल वा उम्मेदवारलाई आयोगले तत्कालैदेखि लागू हुनेगरी बढीमा ६ वर्षसम्म कुनै पनि निर्वाचनमा भाग लिन रोक लगाउने वा उम्मेदवार हुन अयोग्य घोषित गर्ने निर्णयसमेत गरेको छ ।
ऐनमा भनिएको छ, ‘जरिवाना ६ महिनासम्म नबुझाउने राजनीतिक दल वा उम्मेदवारलाई आयोगले तत्कालैदेखि लागू हुनेगरी बढीमा ६ वर्षसम्म कुनै पनि निर्वाचनमा भाग लिन रोक लगाउन वा उम्मेदवार हुन अयोग्य घोषित गर्न सक्नेछ । त्यस्तो व्यक्ति निर्वाचित भएको रहेछ भने निजको निर्वाचन स्वतः बदर हुनेछ ।’
आयोगको निर्णपछि धरान उपमहानगरपालिकाका मेयर हर्क साम्पाङ राईले निर्वाचन आयोगलाई जरिवाना तिर्न तयार रहेको प्रतिक्रिया दिएका छन् । निर्वाचन आयोगले ढिला निर्वाचन खर्च बुझाएको भन्दै नामसहित जरिबाना रकम तोकेपछि राईले सामाजिक सञ्जालमार्फत् जवाफ दिएका हुन् ।
मेयर साम्पाङले आयोगले तोकेको पाँच लाख ५० हजार जरिवाना तिर्न रहेको तर आफूले तिरेको जरिबाना भ्रष्टाचारीको भुँडीमा नपरोस् भनेका छन् । ‘पाँच् लाख ५० हजार जरिवाना तिर्न तयार छु तर मैले तिरेको जरिबाना रकम भ्रष्टाचारीको भुँडीमा नपसोस्,’, उनले लेखेका छन्, ‘नत्र त्यो भुँडी फुटाउने गैंती चलाउन नि आम्चा हाम्लाई !’
सत्यपाटी । काठमाडौं ।